Bərdə rayon İcra Hakimiyyəti "Speys" televiziyasının əməkdaşı Gündüz Məmmədovun başçı Vidadi İsayevin sifarişi ilə işdən çıxarılması xəbərinə münasibət bildirib.

Qurumun Sosial-İqtisadi İnkişafın Təhlili və Proqnozlaşdırılması Şöbəsinin müdiri İlham Məmmədov Aznyus.az-a açıqlamasında bildirib ki, bu məsələnin onlara heç bir aidiyyəti yoxdur:

"Speys" müstəqil televiziyadır və onun rəhbərliyi var. Əgər kanal rəhbərliyi kimisə işdən çıxarıbsa, orada icra başçısısın rolu olmur. Rayon icra başçısının sözü ilə heç kimi işə götürmürlər ki, onun da sözü ilə işdən uzaqlaşdırsınlar".

İ. Məmmədov Gündüz Məmmədovun yaxşı kadr olduğunu deyib:

"Gündüz yaxşı oğlandır və eyni zamanda gözəl mütəxəsisdir. Özünə hörmət edən televiziya rayon icra başçısının əmri, ya da göstərişi ilə kimisə işdən çıxarmır".

Qeyd edək ki, Speys TV-nin müxbiri Gündüz Məmmədov işdən çıxarılıb. Jurnalist iddia edir ki, rəhbərlik onu Bərdə rayonunun icra başçısı Vidadi İsayevin göstərişi ilə işdən uzaqlaşdırıb.