Bakı Azərbaycan-İran-Rusiya üçtərəfli əməkdaşlıq formatının davamına ümid edir.

Axar.az xəbər verir ki, bunu Azərbaycan Prezidenti İlham Əliyev "Sputnik" agentliyinə müsahibəsində deyib. "Biz fəxr edirik ki, belə bir görüşü təşkil edə bilmişik. Ümid edirəm ki, bu, gələcəkdə də davam edəcək", - Prezident müsahibəsində vurğulayıb.

Azərbaycan Prezidentinin sözlərinə görə, bu üçtərəfli format beynəlxalq siyasətdə ciddi faktora çevrilib:

"Bu nə regional, nə də nəqliyyat formatıdır. Bu, ciddi xarici siyasət, geosiyasi təşəbbüs və reallıqdır. Və biz də bu formatı genişləndirmək üçün hər şeyi edirik. Biz rus və iranlı həmkarlarımız tərəfindən də eyni addımı görürük".

Qeyd edək ki, Azərbaycan-İran-Rusiya üçtərəfli əməkdaşlıq formatının ilk görüşü avqustun 8-də Bakıda keçirilib. Növbəti görüşün İranın paytaxtı Tehranda keçirilməsi gözlənilir.