2014-cü ildə İtaliya polisi Rövşən Lənkəranski barədə axtarış elan edəndən sonra o, bir müddət Frenk El Kapone kimi tanınan Fizuli Məmmədovun Milandakı və Berqamodakı vilallarında gizlənib. O, dostu, çeçen qanuni oğru Həmzat Qastamirovla birgə olub.

Bu məlumat Axar.az-a etibarlı mənbədən daxil olub. Mənbənin dediyinə görə, Fizuli Məmmədovun əslən Salernodan olan mafioz Mateto Messina Denarolya da əlaqələri olub. Neçə vaxtdır axtarışda olan Denaroyla onu Provenzano ailəsi bağlayır. Məhz bu ailəylə Frenkin ortaq biznesinin də olduğu deyilir.

Elə Rövşənin otellərin alınmasında vasitəçi də məhz Frenk olub. Sonra onu İsveçrəyə qaçıra bilib. İsveçrədən isə o, Bülənt Bafralının köməyilə Almaniya keçib və daha sonra saxta pasportla Türkiyəyə gələ bilib.

Xatırladaq ki, İtaliya maliyyə polisi bir qədər əvvəl qətlə yetirilmiş qanuni oğru Rövşən Lənkəranskinin bu ölkədəki əmlaklarıyla bağlı araşdırmaya başlayıb. Lent.az-ın məlumatına görə, polis Lənkəranskiyə aid iki otelin yerini müəyyənləşdirilib. İtaliyanın cənnət bölgələrindən sayılan Salerno yaxınlığındakı Pozitano qəsəbəsində yerləşən "Le Sirenuse" və "Hotel Covo dei Saraceni" otelləri Lənkəranski tərəfindən nəğd qiymətə alınıbmış. Qanuni oğru bu otellərə üst-üstə 101 milyon avro pul ödəyib.

Məlumata görə, "Covo dei Saraceni" oteli Lənkəranskinin kriminal aləmdəki müttəfiqi Şeyx Həmzət adyıla tanınan Xamzat Qastamirovun xanımının, ikinci oteli isə Rövşənin yaxın qohumlarından birinin adına keçirib.

2014-cü ildə İtaliya azərbaycanlı kriminal avtoritet barəsində beynəlxalq axtarış elan edəndən sonra Lənkəranski adıgedən otellərdən başqa İtaliyada nəğd pulla aldığı restoranları və daha dörd koteci də Qastamirovun adına keçirməyə nail olub.

Həmin vaxt Rövşən Lənkəranski mütəşəkkil cinayətkarlıq, qəsb, rüşvətxorluq, çirkli pulların yuyulması və rəsmi sənədləri saxtalaşdırmaqda təqsirli bilinərək, İtaliya tərəfindən axtarışa verilmişdi.

Məlumata görə, adıgedən daşınmaz əmlak siyahısı bununla bitmir. Lənkəranskinin Berlində, Hamburq və Münhendə belə əmlakları var. Və onların idarəçiliyi də Qastamirov tərəfindən həyata keçirilir.

Bu həmin Qastamirovdur ki, bir qədər əvvəl elə həmin Berlində türk və çeçen kriminal dairələrini başına yığaraq Rövşən Lənkəranskinin qisasının alınacağını bildirmişdi. Başqa bir məlumata görə, Şeyx Həmzət qüvvələrini son illər Almaniyada yaşayan türk mafioz klanın lideri Bülənt Bafralı və cinayətkar aləmdə nüfuzlu olan Sedat Şahinlə birləşdirib. Mənbənin bildirdiyinə görə, belə bir birləşmə kriminal aləmdə son 26 ildə ilk dəfə baş verir. Tezliklə İtaliya mafiyasının boslarından sayılan Matteo Messina Denaro (ləqəbi "Dyabolik") və Bernardo Provenzano da Şeyxə dəstək verəcəklərini bildiriblər.