"Uşaq vilayətindəki təşkilatımızla, məclis üzvləri ilə görüşdükdən sonra Xocalı abidəsinin üzərindən "soyqırım" sözünün götürülməsi ilə bağlı MHP olaraq mövqeyimizi ortaya qoyacağıq. İstənilən halda MHP bu qərara qarşıdır və bu qərar Xocalı qurbanlarına sayğısızlıqdır".

Bu sözləri "Axar.az" a açıqlamasında MHP sədri Dövlət Baxçalının Yerli İdarəçilik məsələləri üzrə yardımçısı və Yozqatdan millət vəkili Sadir Durmaz dedi.

O bildirdi ki, həmin bələdiyyənin rəhbərliyi MHP-dən olmadığı üçün qərarı dəyişmək səlahiyyətləri yoxdur:

"Uşaq bələdiyyəsi MHP-də deyil. Oranın yerli idarəçiliyini son seçkilərdən sonra AKP həyata keçirir. Buna görə, onların qərarına müdaxilə etmək səlahiyyətimiz yoxdur. Ancaq bu o demək deyil ki, heç bir fəaliyyətimiz olmayacaq. Rəhbərlik olaraq müzakirə edəndən sonra verəcəyimiz qərarları görəcəksiniz".

Xatırladaq ki, Uşaq vilayətində Xocalı soyqırımına qoyulan abidənin üzərindən "soyqırım" sözü silinərək, "qətliam" yazılıb. Uşaq bələdiyyəsinin Park və bağçalar şöbəsinin müdiri Evrən Pür "Axar.az"a faktı təsdiqləyib və abidədən "soyqırım" sözünün silinməsi qərarının Türkiyə Xarici İşlər Nazirliyi tərəfindən verildiyini bildirib.