Srağagün keçirilən "Avroviziya 2014" müsabiqəsinin finalındakı səsvermə ilə bağlı yeni qalmaqal ortaya çıxıb.

"Axar.az" xəbər verir ki, Ermənistanın "news.am" saytı səsvermə zamanı Azərbaycanın Ermənistana 10 bal verdiyini, amma səsləri təqdim edən aparıcının (Səbinə Babayeva - red.) bu xalı sonradan dəyişdirərək, guya İrlandiyaya verildiyini açıqladığını bildirib.

Hətta danimarkalılar azərbaycanlı aparıcının çaşdığını görüb, onun 10 balı hansı ölkəyə verdiyini təkrar səsləndirməsini istəyiblər. Azərbaycanlı aparıcı da 10 balın İrlandiyaya verildiyini deyib.

Sayt İrlandiyanın final müsabiqəsində iştirak etmədiyini xüsusi vurğulayıb.

"News.am" hətta bu barədə isveçli jurnalist Kris Bossvelin öz Tvitter səhifəsində yazdığını da xəbər verib.

Qeyd edək ki, sayt əvvəlcə Azərbaycanın Ermənistana 8 bal verdiyini yazsa da, sonradan məlumatı dəyişdirərək 10 bal edib.

Saytın Azərbaycanın Ermənistana əvvəlcə 8, sonra isə xəbəri yeniləyərək 10 bal verdiyini yazmasının skrinlərini təqdim edirik: