İsrail Rusiya Hərbi Dəniz Donanmasına aid hərbi gəminin Hayfa limanına daxil olmasına icazə verməyib.

"Axar.az" xəbər verir ki, bu barədə "Haaretz" qəzeti adının açıqlanmasını istəməyən mənbəyə istinadən yayıb.

Qəzetin yazdığına görə, insident ötən ay baş verib. İsrail tərəfi bu addımı BMT-də keçirilən səsvermə zamanı Ukrayna məsələsində neytral mövqe tutduğuna görə, yenidən ABŞ-ı hirsləndirməmək üçün atıb.

Gəminin adı bildirilməsə də, qəzet onun raket gəmisi olduğunu yazıb.

Qəzet bildirib ki, gəminin limana buraxılmaması qərarını İsrail Baş nazirinin milli təhlükəsizlik üzrə müşaviri Yosi Koen müdafiə naziri Moşe Yalon, İsrail ordusu (ÇAXAL) və Ümumi Təhlükəsizlik Xidməti (ŞABAK) nümayəndələri ilə məsləhətləşdikdən sonra verib.

Qeyd edək ki, təxminən 1 ay əvvəl rus mətbuatında "Vitse-admiral Kulakov" gəmisinin Hayfa limanına yan alacağı ilə bağlı məlumat yayılmışdı.