Kiyevin Şevçenko rayon milis idarəsi şəhər sakini Mariya Katarenkonun şikayəti əsasında Maydanda kütləvi qətliamlarla bağlı cinayət işi açıb.

Axar.az xəbər verir ki, Mariya Katarenkonun sənədlərində Maydandakı kütləvi qətliamın Prezident Vladimir Putinin təlimatları əsasında xüsusi xidmət orqanları tərəfindən təşkil olunduğu göstərilib.

Mariya daha sonra bunları deyib: "Mən oğlumun Həmkarlar İttifaqının binasında yanması, onun dostunun hazırda ölkənin şərqində vuruşan rus snayperi tərəfindən sol gözündən vurulması ilə bağlı təkzibolunmaz faktlardan danışıram.

Bütün izlər Putinə aparır. Mən bu şikayəti ona görə vermişəm ki, Putinin bizim övladlarımızın qətlinin arxasında dayandığı üzə çıxsın. Məndə olan məlumata görə, Kiyevdəki anti-terror əməliyyatı Putinin nəzarəti altında Federal Təhlükəsizlik Xidməti (FTX) tərəfindən həyata keçirilib. Əməliyyat "Qaranquş" ("Lastoçka") adı altında keçirilmişdi. Mənim ərim bunu inanılması çətin olan bir vəziyyətdə əldə etmişdi.

İndi mən Maydanda həlak olan gənclərin valideynlərini axtarıram. Biz sübut edəcəyik ki, Putin cinayətkardır. Dünya ictimaiyyəti həqiqəti bilməlidir".