"Jirinovski azərbaycanlıları təhqir etməyib".

Bu sözləri Axar.az-a açıqlamasında rusiyalı deputat və LDPR partiyasında Jirinovskinin yaxın tərəfdaşlarından sayılan Roman Xudyakov deyib. O, Jirinovskinin sadəcə, adi tarixi mövzunu müzakirə etdiyini bildirib:

"Qısa desək, Vladimir Volfoviç heç kimi təhqir etməyib. O, sadəcə olaraq, alimlərin bu gün də mübahisə etdiyi tarixi mövzunu müzakirə edib".

Deputat Ukraynaya Rusiya qoşunlarının yeridilməsi ehtimali ilə bağlı suallarımızı da cavablandırıb. R.Hudyakov Kiyevin Moskvanı provokasiyaya çəkmək istədiyini söyləyib:

"Ukraynaya gəlincə isə burada situasiya hər gün dəyişir. Onlar Rusiyanı hər dəqiqə qoşunlarını Şərqi Ukraynaya yeritməsi ilə bağlı provokasiyaya çəkir, sərhəd postlarını və şəhərləri güllələyirlər. İndi biz bütün beynəlxalq aləmin nümayəndələrini bura cəlb edərək, onların hər şeyi öz gözləri ilə görüb Ukrayna hakimiyyətinə təzyiq etmələrini istəyirik".

Qeyd edək ki, bir müddət öncə parlamentdə çıxış edən Jirinovski azərbaycanlıları kaspilər (xəzərlər – red.) adlandırmış, daha sonra isə belə bir xalqın, ümumiyyətlə, olmadığını bildirmişdi. Məhz buna görə bu gün Moskvada yaşayan milliyyətcə azərbaycanlı olan Məmmədovlar ailəsi Jirinovskini məhkəməyə vermiş, onlardan üzr istəməsini və 100 milyon rubl kompensasiya verilməsini tələb edirlər.

Məhkəmə artıq iddia ərizəsini qəbul edib.