"Azəbaycanın hərbi hissələrində bir nömrəli hərbi hazırlıq elan edilməlidir".

Axar.az xəbər verir ki, bu açıqlama ilə Rusiyanın Federal Təhlükəsizlik Xidmətinin (FSB) keçmiş polkovniki Sakit Allahverdiyev öz Feysbuk səhifəsində çıxış edib.

O, dünənki hücumda qeyri-adi heç bir şeyin olmadığını və hər şeyin müharibə qanunlarına uyğun olduğunu bildirib:

"Başın sağ olsun, Azərbaycanım! Heç bir səs-küy, panika yaratmadan müharibəyə hər gün, hər an hazır olmaq lazımdır! Müharibə qığılcımı hər gün, hər an böyük bir alova çevrilə bilir. Burada qeyri-adi bir şey yoxdur, ancaq siyasi və müharibə qanunauyğunluqları var. Bunu gözləmək, əvvəlcədən hesablayaraq incələmək və nəticə çıxarmaq lazım idi. Müharibəni alovlandıran hansı səbəblərdir? Son bir neçə ayda dünyada siyasi münasibətlər tarazlığının pozulması və siyasi qarşıdurmanın savaş, müharibə qarşıdurmasına çevrilməsi artıq reallıqdır. Şərq ölkələrində baş verən daxili çevrilişlər son zamanlar xarici təcavüzə qarşı çevrilən savaşlarla əvəz olunur. Amerika-Rusiya qarşıdurması Suriyadan Ukrayna müharibəsinə çevrildi. Yaxın Şərqdə İsrail-Fələstin qarşıdurması yenidən alovlanaraq qaynar savaşa çevrildi. İŞİD Suriyadan hərəkatı İraqa çevirərək ölkəni zəbt edir. Azərbaycan-Ermənistan sərhədində ermənilər təcavüz edirlər. Artıq həlak olanlar var. Rusiyanın, Ermənistanın həmkarı olan İran müqavilə bağlamasa, Hizbullaha yardım etmək məcburiyyətində qalacaq və savaşın aktiv iştirakçısına çevrilə bilər".

O, Azərbaycanın bir nömrəli hərbi hazırlıq etməli olduğunu deyib:

"Belə bir siyasi və müharibə şəraitində olan Azərbaycan dövləti nə etməlidir? Azəbaycanın hərbi hissələrində bir nömrəli hərbi hazırlıq elan edilməlidir! Unutmaq olmaz ki, üzdəniraq düşmənlərimiz hər zaman belə siyasi və gərgin vəziyyətlərdən çox məharətlə istifadə etmişlər və bu məharətin nəticəsi olaraq torpaqlarımızı zəbt etmişlər".