Türkiyədə yaşayan Rusiya və Qafqaz məsələləri üzrə ekspert Orxan Cəfərli son günlərdə cəbhədə baş verən hadisələri şərh edib.

Axar.az xəbər verir ki, özünün Feysbuk səhifəsində baş verən hadisələrə münasibət bildirən ekspert cəbhədə vəziyyətin gərginləşməsini yaxınlaşmaqda olan Soçi görüşü ilə əlaqələndirib:

"Yuxarı Qarabağda neçə gündür davam edən atışmalarda yayılan informasiyalarda dəqiqlik yoxdur. Nə baş verdiyi və Ermənistan tərəfinin itkiləri ilə bağlı informasiyalar həddindən artıq azdır.

Hər iki tərəf durduqları yerdə atəş açmaqda davam edir. Azərbaycan ordusunun irəliləməsi ilə bağlı hər hansı bir məlumat yoxdur.

Ermənistan və Azərbaycan prezidentləri hər il Rusiya prezidentinin dəvəti ilə Soçidə bir araya gəlir. Və artıq neçənci dəfədir ki, bu görüşlərdən öncə Dağlıq Qarabağda atışmalar başlayır. Birinci dəfə deyil, amma bu dəfə daha uzun çəkdi.

Ümid edirəm ki, Dağlıq Qarabağ problemi sülh yolu ilə həll olunacaq".