"Azərbaycan Soçi görüşünə getməyə hazırdır, amma əsas şərti görüşün gündəliyinin formalaşmasıdır".

Bu sözləri Axar.az-a politoloq Qabil Hüseynli Azərbaycan və Ermənistan prezidentlərinin Soçi görüşünü şərh edərkən deyib.

O, Soçi görüşünü Rusiyanın Qafqazda nəzarəti əlinə almaq üçün keçirmək istədiyini bildirib:

"Rusiyanın Soçi görüşündə əsas məqsədi Azərbaycan qoşunlarının uğurlu hərbi əməliyyatlarının dayandırılmasından ibarətdir. Görüşün gündəliyinə atəşkəs rejiminin qorunması, həmçinin tərəflərin kompromisə gəlinməsi məsələsi salınıb. Putin burada hiyləgər addım atır. O, əvvəlcə xeyli şirnikləndirici vədlərlə Azərbaycanı öz yanına çəkməyə çalışdı. Lakin birdən-birə Avrasiya İttifaqına üzvlüklə bağlı sərt tələblər gəlməyə başladı. Bunların heç biri diplomatik qanuna uyğunluqlar çərçivəsində edilmədi. Azərbaycan buna etiraz edəndə Moskva Ermənistan vasitəsilə Bakının təhdidinə başladı. Bu hadisələr elə bir zamanda baş verdi ki, həmin vədədə ölkənin ordusunu idarə edəcək iki şəxs qısamüddətli məzuniyyətdə idilər. Onlar elə təsəvvür edirdilər ki, ermənilərin əməliyyatları uğurlu olacaq. Lakin bunun qarşısı alındı. Tezliklə hər iki şəxs geriyə döndü və qoşunlar səfərbər edildi, əks hücumla ermənilərə yaxşı göz dağı verildi. Moskva öz planının baş tutmadığını görəndə Soçi görüşü ideyasını ortalığa atdı. İndi Bakı görüşün gündəliyinin formalaşdırılmasını tələb edir. Onlar deyirlər ki, tərəflər kompromisə gəlməlidirlər. Amma bu, deklorativ bir çağırışdır. Digər tərəfdən isə Soçi görüşü Fransa və ABŞ-ı hadisələrdən kənarda qoyub Cənubi Qafqazda nəzarəti əlinə almaq imkanı yaratmaq üçündür. Azərbaycan Soçi görüşünə getməyə hazırdır, amma əsas şərti görüşün gündəliyinin formalaşmasıdır. Əliyev görüşdə münaqişənin həlli və atəşkəs rejiminin qorunub saxlanılması mexanizminin hazırlanmasını tələb edir. Əgər bu görüş ermənilərə nəfəslərini dərməyə imkan vermək və Bakıya təzyiqlər etmək üçün nəzərdə tutulursa, inanmıram ki, o, baş tutsun".

Politoloq Moskvanın indiki şəraitdə Bakıya təsir edə bilməyəcəyini söyləyib:

"Sülhməramlı qüvvələrin Qarabağda yerləşdirilməsi məsələsi çoxdan var, amma Bakı buna etiraz edir. Azərbaycan Rusiyanın yox, Qazaxıstan sülhməramlılarının yerləşdirilməsini istəyir. Azərbaycan yeddi rayonun qaytarılmasından sonra sülhməramlıların yerləşdirilməsi niyyətindədir. İşğalın sonlandırılması prosesi olmayınca, bölgəyə hansısa sülhməramlıların gətirilməsi məsələsi müzakirə edilə bilməz. Ona görə də Putinin Əliyevə təzyiq etməsi məsələsi boş şeydir. Moskva yaxşı bilir ki, indiki şəraitdə Azərbaycana təzyiq göstərmək olmaz. Çünki artıq gecdir".

Qeyd edək ki, prezidentlərin Soçi görüşü avqustun 8-nə nəzərdə tutulur.