"Azərbaycan hakimiyyəti müqəddərat məsələsini müzakirə edə bilər".

Axar.az xəbər verir ki, bu sözləri millət vəkili Fazil Mustafa Avropa Şurası Parlament Assambleyasında erməni deputatlar ilə müzakirələr barədə qeydində yazıb. Onun sözlərinə görə, ermənilər Qarabağda Şotlandiya prinsipini tətbiq etmək niyyətindədir:

"Avropa Şurası Parlament Assambleyasında Dağlıq Qarabağ probleminin həlli ilə bağlı üzv olduğum Avropa Liberal Demokratik Alyansda gərgin müzakirələr oldu. İlk öncə erməni millət vəkili Zöhrabyan Qarabağ erməniləri üçün Azərbaycanda yaşamağın mümkünsüzlüyünü dilə gətirdi və bildirdi ki, millətlərin öz müqəddəratını təyin etmə hüququ əsas götürülməlidir. Millət vəkili Rəfail Hüseynov onun cavabını verdi ki, işğalla öz müqəddəratını təyin etmə arasında fərqi doğru anlamaq lazımdır".

Millət vəkilinin sözlərinə görə, ermənilər işğal edilmiş torpaqları boşaltdıqdan sonra Azərbaycan hakimiyyəti müqəddərat məsələsini müzakirə edə bilər:

"Bir qədər sonra təkrar söz alan erməni millət vəkili Krımla Qarabağın müqayisəsinin yanlış olduğunu, bu məsələnin Şotlandiya ilə müqaisə olunmasının daha yerində olacağını dilə gətirdi. Bu dəfə mən söz alaraq, bunun erməni həyasızlığı olduğunu bildirdim. Və təklif etdim ki, Ermənistanın Qarabağın işğalı sözünü işlətməkdən Avropa Şurası qorxursa, o zaman Krımın da, Gürcüstan ərazilərinin də işğalından danışmaqdan imtina edin. Ermənilər öz müqəddəratını təyin etmək istəyirlərsə, işğal etdikləri əraziləri boşaltsınlar, bütün qaçqınlar öz torpaqlarına qayıtsınlar, o zaman bölgənin bütün əhalisi ilə birlikdə Azərbaycan hakimiyyəti müqəddərat məsələsini müzakirə edə bilər. Yenidən söz almaq istəyəndə, mən də cavab verəcəyimi bildirdiyimə görə, spiker müzakirələri kəsdi".