Separatizmə qarşı mübarizənin zəruriliyindən dəm vuran Avropa nəinki ikili standartları davam etdirir, üstəlik, təcavüzkar Ermənistanı şirnikləndirən addımlarından geri qalmır.

Bunu Axar.az-a açıqlamasında sabiq dövlət müşaviri Qabil Hüseynli deyib. Politoloq bildirib ki, avropalı investorların Azərbaycanın işğal altında olan ərazisində yeni SES tikilməsinə maliyyə ayırması birbaşa işğalçılıq siyasətinin möhkəmlənməsinə xidmət edir:

“Bu kimi addımlar işğalçının Azərbaycan ərazisində iqtisadi cəhətdən möhkəmlənməsinə, hətta kənardan gələn ermənilərin belə Dağlıq Qarabağda məskunlaşmasına şərait yaradır. Bu gün Ağdərədə SES tikən sabah başqa bir istehsal sahəsini işə salacaq ki, nəticədə ermənilərin iş və məşğulluq problemi, maddi rifah halı yüksələcək. Qərb təcavüzkar Ermənistanı dəstəkləməyə son verməsə, Dağlıq Qarabağ probleminin həlli yolunda çox ciddi əngəllər yarana bilər. Qondarma rejimin iqtisadiyyatını dirçəltməyə yönəlik addımlar danışıqlar prosesinə ciddi zərbədir”.

Politoloq qeyd edib ki, son zamanlar Paşinyanın da məhz bu ruhda danışması və Dağlıq Qarabağla bağlı sərsəmləmələri müxtəlif xristian ölkələrinin ermənilərə açıq siyasi dəstəyindən xəbər verir:

“Sərsəng su anbarı yaxınlığında tikiləcək yeni SES ABŞ və Avropadakı Erməni Milli Konqresinin layihəsi də ola bilər. İstənilən halda bu addım qəbuledilməzdir. Əgər sülhyaratma prosesində iştirak edən həmsədr dövlətlərdən birinin və yaxud da digər Avropa ölkəsinin ölkəmizə qarşı belə mənfi donda çıxış etməsi aşkarlanarsa, bu, danışıqların gələcəyini ciddi təhlükə altında qoyacaq”.