Njdenin faşistlərlə əlaqəsi, 25 minlik erməni faşist legionun yaradılmasında rolu, bütün keçmiş sovet xalqlarından formalaşan sovet ordusuna qarşı döyüşməsi və yəhudilərə qarşı soyqrımda aktiv iştirakı danılmazdır və sənədlərlə artıq sübut olunub.

Bu sözləri Axar.az-a açıqlamasında millət vəkili Tahir Mirkişili MDB Dövlət Başçıları Şurasının iclasında Prezident İlham Əliyevin nitqini şərh edərkən deyib. O bildirib ki, müasir dünyada faşizm ideyalarının təbliğ olunması və faşistlərin qəhrəmanlaşdırılması ən təhlükəli meyildir:

“Qaregin Njde 1918-1921-ci illərdə Zəngəzur mahalında yerli azərbaycanlılara qarşı vəhşi cinayətlərin törədilməsinə də başçılıq etmişdir. Belə bir faşist cinayətkara Ermənistan hökuməti tərəfindən heykəl qoyulması ilk növbədə Ermənistanın əvvəlki hökumətinin xislətindən, faşist ideyalarının daşıyıcısı olmasından irəli gəlmişdir. Çünki məhz onlar eyni faşist metodları ilə Dağlıq Qarabağda azərbaycanlıların qətlinin müəllifləri idi. Azərbaycan Prezidenti İlham Əliyevin Aşqabadda MDB ölkələrinin dövlət başçıları görüşündə bu məsələni qaldırması, tarixi faktlarla əsaslandırması və Ermənistanın indiki hökumətini heykəlin götürülməsinə çağırması faşizmə qarşı 20 milyondan çox qurban vermiş SSRİ xalqlarının ərazisində bu qara ləkənin təmizlənməsinə çağırış idi. Bu həm də Ermənistan hökumətinin faşizmə qarşı vuruşmuş öz erməni xalqına hörmət etməsinə bir çağırış idi. Regionda sülh, əmin-amanlıq və mehriban birgə yaşayışda ən çox maraqlı olan ölkə kimi Azərbaycan qonşuluğunda faşizm ideyalarının çiçəklənməsinə qarşıdır və bunu regionun xalqları üçün ən böyük təhlükə sayır. Məsuliyyətli və regionun gələcək taleyində maraqlı olan bir lider kimi İlham Əliyevin bu məsələdə qətiyyətli mövqeyi regionun bütün xaqlarının maraqlarına xidmət edir”.