Məhkum Lamiyə Quliyevanın həbsdə ana olması məsələsi Milli Məclisdə qaldırılıb.

Axar.az xəbər verir ki, üç həftəyə yaxındır ölkə mediası tərəfindən müzakirə edilən məsələ artıq parlament səviyyəsinə qalxıb.

Ümid Partiyasının sədri, deputat İqbal Ağazadə bildirib ki, qanunvericiliyə görə, Lamiyənin nikahdan kənar heç kimlə görüşmək imkanı yoxdur. Millət vəkili həbsdə olan qadının uşağının necə olduğunu anlamaqda çətinlik çəkdiyini söyləyib.

ANS-in xəbərinə görə isə millət vəkili Zahid Oruc bildirib ki, Lamiyə Quliyevanın həbsxanada nikahdankənar uşaq dünyaya gətirməsi məsələsi ilə əlaqədar məsələyə hüquqi qərar verilməli və günahkarlar cəzalandırılmalıdır:

"Ümumiyyətlə, Lamiyə Quliyevanın işi və həbsi ilə bağlı məsələdə günahkarlar cəzasını almalıdır. Prokuror, hakim, bu işi aparmış müstəntiq və başqa kim günahkardırsa, o cəzalandırılmalıdır. Burada insan həyatı üzərindən qaralama kampaniyası aparılır, buna birdəfəlik hüquqi qiymət verilməlidir".

Xatırladaq ki, Lamiyə Quliyeva Şəmkirin sabiq icra başçısı, keçmiş kənd təsərrüfatı nazirinin müavini Aslan Aslanovun oğlunu öldürüb.