Xəbər verdiyimiz kimi, bu gün Fövqəladə Hallar Nazirliyinin işçilərinin peşə bayramı günüdür. Bu münasibətlə, fövqəladə hallar naziri general-polkovnik Kəmaləddin Heydərovun rəhbərliyi ilə Fövqəladə Hallar Nazirliyinin (FHN) kollektivi ulu öndər Heydər Əliyevin məzarını ziyarət edib, sonra Şəhidlər Xiyabanında Vətənimiz uğrunda canlarından keçmiş şəhidlərimizin xatirəsini yad edib.

Publika.Az-ın məlumatına görə, daha sonra FHN-in inzibati binasında keçirilən təntənəli mərasim dövlət himninin səsləndirilməsi ilə başlayıb. Sonra FHN-nin fəaliyyətini əks etdirən film nümayiş olunub.

Çıxış edən nazir Kəmaləddin Heydərov Azərbaycanda Fövqəladə Hallar Nazirliyinin yaradılmasının 8-ci ildönümü - Nazirliyin işçilərinin peşə bayramı münasibəti ilə şəxsi heyəti təbrik edib, onlara çətin, lakin şərəfli vəzifələrinin yerinə yetirilməsində uğurlar arzulayıb, daha sonra hesabat xarakterli çıxış edib.

Nazir vurğulayıb ki, bu il FHN üçün də əlamətdar il hesab olunur: "Çünki bu il prezident İlham Əliyev növbəti dəfə xalqın böyük etimadını qazanaraq prezident seçilib. Bu münasibətlə FHN əməkdaşları adından cənab prezidenti təbrik edirəm".

Sonra əlamətdar gün ərəfəsində nazirliyin bir qrup əməkdaşına ali hərbi rütbələrin, orden və medalların, fəxri adların verilməsi haqqında Azərbaycan Prezidentinin imzaladığı sərəncamları oxunub. Həmçinin, nazirliyin xidmətdə fərqlənən əməkdaşları fövqəladə hallar naziri Kəmaləddin Heydərovun əmri ilə təltif olunublar.

Sonda mərasim iştirakçıları adından Silahlı Qüvvələrin Ali Baş Komandanı, prezident İlham Əliyevə müraciət qəbul olunub.