"Ermənistan hər zaman Cənubi Qafqazda balansın formalaşdırılması üçün öz xidmətlərini böyüklərinə təqdim edir".

Axar.az xəbər verir ki, bu açıqlama ilə Türkiyənin "Star" qəzetinin köşə yazarı Sevil Nuriyeva çıxış edib. O, Dağlıq Qarabağ münaqişəsinin həllində yalnız Türkiyənin israrlı olduğunu bildirib:

"Son günlərdə Qarabağda atəşkəsin yenidən pozulması heç də təsadüfi deyil. Çünki həm ABŞ-ın, həm də Rusiyanın Ermənistan üzərindəki təsir imkanlarını görməzlikdən gələ bilmərik. Ermənistan hər zaman Cənubi Qafqazda balansın formalaşdırılması üçün öz xidmətlərini böyüklərinə təqdim edir. Məsələnin qəribə tərəfi odur ki, Ermənistan bəzən Rusiya, bəzən ABŞ, bəzən də erməni diasporunun istəklərinə uyğun olaraq mövqe nümayiş etdirir. Qarabağ düyününün çözülməsini böyük qüvvələrin istəməsi çox önəmlidir. Görünən odur ki, bu istək Türkiyə xaricində heç bir böyük dövlətdə yoxdur. Çünki Rusiya Qarabağ probleminin həll olunmasından sonra Ermənistanın hər zamanki kimi mövqe dəyişdirəcəyindən narahatdır. Dağlıq Qarabağ problemi Cənubi Qafqazın inkişafında ən böyük maneədir. Bu maneənin ən böyük aktyoru olan Ermənistan isə həm Qərbin, həm də Rusiyanın əsiridir".