Ötən gün İstanbulda Qarabağa azadlıq və Xocalı soyqırımını törətmiş cinayətkarların cəzalandırılması tələbiylə möhtəşəm yürüş keçirilib.

VHP mətbuat xidmətindən Axar.az-a verilən məlumata görə, hər il fevral ayında Xocalı soyqırımınn anılması, terroru rəsmi dövlət siyasətinə çevirmiş Ermənistanın işğalçılıgına son qoyulması tələbi ilə yürüşlərin, mitinqlərin, yığıncaqların keçirilməsi Türkiyədə artıq ənənəyə çevrilib. Unuversitetlərin, qeyri-hökumət təşkilatlarının, çeşidli mərkəz və qurumların "Xocalıya ədalət" çağırışıyla keçirdiyi simpozium və konfranslara on minlərlə insan qatılır. Ermənilər uydurma "erməni soyqırımı"nın 100 illiyini dünyanın hər yerində qeyd etməyə hazırlaşdıqları bir ərəfədə Xocalı soyqırımı ilə bağlı tədbirlər həm Azərbaycan, həm Türkiyə üçün xüsusi əhəmiyyət daşıyır.

Kadıköy bələdiyyə evindən başlayan yürüş şəhərin mərkəzi küçələrindən keçməklə Kadıköy meydanında mitinqlə başa çatıb. Turan Hərəkatı Platforması, Ülküçü Gənclər Təşkilatları, sivil toplum örgütləri, tələbələr tərəfindən düzənlənmiş yürüşə Azərbaycanın xalq şairi, millət vəkili Sabir Rüstəmxanlı da qatılıb.

XX əsrin ilk illərindən başlamış Xocalıya qədər davam edən soyqırımları və ümumən Azərbaycan həqiqətlərindən danışan millət vəkili sözdə "erməni soyqırımı" və Qarabağ probleminin eyni zəncirin həlqələri olduğunu vurğulayaraq bundan sonra "bir millət iki dövlət" təbiri ilə tarixə düşmüş Azərbaycan və Türkiyənin dövlət olaraq bu məsələlərdə birgə səylərinin və ardıcıl əməkdaşlığının zəruriliyinin qaçılmaz olduğunu qeyd edib.

Qarşıdakı günlərdə Sabir Rüstəmxanlı Azərbaycanın İstanbul baş konsulluğunda Xocalı soyqırımı ilə bağlı planlaşdırdığı tədbirlərdə, eləcə də İstanbul, Aydın, Yalova, Muğla universitetlərində keçiriləcək Xocalı konfranslarında iştirak edəcək.