Ölkəmizdə koronavirus pandemiyasının geniş yayılmasının qarşısının alınması, əhalinin sağlamlığının qorunması, rifahının yaxşılaşdırılması ilə bağlı gördüyü işlərə görə Azərbaycan Respublikasının Prezidenti İlham Əliyevə vətəndaşlardan minnətdarlıq məktubları gəlməkdə davam edir.

Axar.az Azərbaycan Qarabağ Müharibəsi Əlilləri, Veteranları və Şəhid Ailələri İctimai Birliyinin Nəsimi rayon ərazi təşkilatının sədri Azər Quliyevin məktubunu təqdim edir:

Möhtərəm cənab Prezident!

Bütün dünya üçün qorxulu fəsadlara yol açan koronavirus pandemiyası Azərbaycandan da yan keçməyib. Dünyanın nəhəng dövlətlərinin COVID-19 qarşısında aciz qaldığı bir zamanda dövlətimiz Azərbaycan Sizin uzaqgörən siyasəti sayəsində xalqımıza bu bəladan minimum ziyan dəydi. Epidemiyanın üzə çıxdığı ilk gündən etibarən zəruri olan bütün tədbirlərin görülməsi məhz sizin düzgün siyasətiniz nəticəsində mümkün oldu. Vətəndaşların sağlamlığının qayğısına qalan Prezident olaraq, az bir vaxtda yeni tipli xəstəxanaların inşa edilməsi, ölkəmizdən kənarda olan vətəndaşlarımıza belə dövlət səviyyəsində qayğı və dəstək göstərilməsi, aztəminatlı ailələrə maddi yardım göstərilməsi və digər tədbirlər Sizin yüksək liderlik, təşkilatçılıq qabiliyyətinizin nəticəsidir.

Qeyd edim ki, bütün dünyanı bürüyən pandemiya şəraitində hər bir vətəndaşımızın sağlamlığı üçün Sizin qabaqlayıcı tədbirlərinizin, imzaladığınız sərəncamların, qəbul etdiyiniz qərarların, həmçinin həkimlərimizin, polislərimizin qayğısı və xidmətləri əvəzsizdir. Buna görə Sizə Azərbaycan Qarabağ Müharibəsi Əlilləri, Veteranları və Şəhid Ailələri İctimai Birliyinin Nəsimi rayon ərazi təşkilatının üzvləri adından minnətdarlığımı bildirirəm.

Cənab Prezident, bu pandemiya ilə mübarizədən üzüağ çıxacağımıza inanıram. Sizin çağırışınıza qoşularaq deyirik ki, biz birlikdə güclüyük.