"İran üzərindən sanksiyaların tam şəkildə götürülməsi 2016-ci ilin sonundan tez baş verə bilməz".

Bu sözləri Axar.az-a açıqlamasında rusiyalı politoloq Konstantin Kalaçev söyləyib.

Onun sözlərinə görə, İran qazı hazırda Avropaya hər kəsdən çox gərəklidir:

"Qərbə İrana münasibətlər mövzusunda proqres iqtisadi və siyasi səbəblər ucbatından lazımdır. Siyasi nöqteyi-nəzərdən danışıqlardan inkişaf nüvə silahlarının yayılmaması haqqında müqaviləyə baxılması üçün keçiriləcək növbəti konfransdan öncə lazımlı ola bilər. Bu konfransın aprel ayında keçirilməsi nəzərdə tutulur. Diplomatlar arasında belə bir fikir var ki, İran nüvə problemi, ümumiyyətlə, həmin müqavilənin varlığı üçün çağırışdır. Belə ki, İran onun müddəalarından yan keçmək imkanı tapa bilib. Demək ki, başqaları da bunu bacara bilər. Bundan əlavə, pis sülh belə həmişə müharibədən yaxşıdır. İqtisadiyyat nöqteyi-nəzərindən Avropa Birliyinə İran qazı Rusiyadan qaz məsələsində asılılığı azaltmaq üçün lazımdır. Neftlə bağlı situasiya tam şəkildə birmənalı deyil. Neftin qiymətinin aşağı olması Amerikanın neft sənayesini də sarsıdır. Digər bir tərəfdən neftin qiymətlərinin aşağı olması imkanları həmçinin Rusiyaya qarşı iddiaları da azalda bilər".

Politoloqun fikrincə, İrana qarşı sanksiyalar tezliklə ləğv edilməyəcək. O, ABŞ-la İranın bu məsələdən qarşılıqlı mənfəət əldə etdiklərini bildirib:

"Qərb sanksiyaları İranın razılaşmaya nə dərəcədə riayət edəcəyindən asılı olaraq ləğv edəcək. Ona görə də, tərəflərin manevr üçün imkanları var. İran üzərindən sanksiyaların tam şəkildə götürülməsi 2016-ci ilin sonundan tez baş verə bilməz. Artıq ABŞ və İranın razılaşmanın bir sıra detallarını eyni dərəcədə anlamaması ilə bağlı məqamlar peyda olub. Amma ümumi vektor aydındır. Yəni hər iki tərəfin götürdüyü mənfəət qarşılıqlıdır".

Kalaçev İrana qarşı sanksiyaların ləğv edilməsindən ən çox uduzanın Rusiya olacağını söyləyib:

"Açıq və dünyəvi İran hələlik arzu olaraq qalır. Mən 1978-ci ildə ABŞ-ın dünyəvi İranı dini fundamentalizm yolunu tutan ölkə ilə əvəz etməsinə inanmıram. Yaxın Şərq savaşına gəlincə, burada hər kəsin öz başı və öz marağı var. Hər şeyi ABŞ-ın üstünə atmağı dayandırmaq lazımdır. Burada obyektiv qarşıdurmalar var, amma müharibə də qaçılmaz deyil. Regionda yad müharibələrin olması enerjidaşıyıcıların qiymətinin artmasını istəyənlərə lazımdır. Bu sıraya silah ticarəti ilə məşğul olanlar da aiddir. Amerikalı ekspertlərin sözlərinə görə, İran üzərindən sanksiyaların götürülməsi neftin qiymətinin 10% düşməsinə gətirib çıxara bilər. Hətta bəziləri bunun iki, üç dəfəyə qədər ucuzlaşacağını bildirirlər. Mən ucuzlaşmanın bu dərəcədə olacağına inanmıram. Amma qiymətlərin 40 dollar olacağına inanıram. Rusiya üçün bu, kritik rəqəmdir, amma ölümcül deyil. İranın neft bazarına qayıtması Rusiyanın iqtisadi maraqlarına ağır zərbə vura bilər. Bu, xüsusilə İranın yeni bazarlar əldə etmək üçün endirimlər və sairə təklif edəcəyi halda daha da pisləşəcək. Neftin qiymətinin 50 dollardan aşağı olması bizim ölkə üçün ciddi problem olacaq. Rusiyanın diversifikasiya imkanları məhdudlaşacaq. Rusiyanın parçalanması olmayacaq. Onun geosiyasi ambisiyaları çoxlarını qorxudur. İran üzərindən sanksiyaların götürülməsi hamıdan çox Rusiyaya ziyan vuracaq. Bu, Azərbaycana da problemlər yaşada bilər".