"Avropa Parlamentinin qondarma, sözdə erməni soyqırımı iddiaları ilə bağlı qərarına bütün dünyada yaşayan türklər etiraz səsini ucaltmalıdır".

Bu barədə Axar.az-a açıqlamasında millət vəkili Qənirə Paşayeva bildirib.

Onun sözlərinə görə, dövlətlərimiz qədər Avropada yaşayan türk kökənli insanlar da yaşadığı Avropa ölkələrində bu müzakirələrə dəstək vermiş millət vəkillərinə və Avropa Parlamentinə ciddi etirazlarını bildirməlidirlər:

"Avropa Parlamentinin yalanlarla bağlı qərarını heç bir türk insanı tanımayacaq və qəbul etməyəcək. Avropa Parlamenti bu qərarı ilə ədalətsiz və haqsızlığa imza atmaqla bərabər bir sıra Avropa ölkələri qondarma erməni soyqırımı yalanlarından öz məqsədləri üçün necə istifadə etdiklərini bir daha göstərdilər. Onların dərin maraqlarını isə hər bir insanımız yaxşı bilməlidir. Yalanlara qarşı ən ciddi mübarizə yolu isə bütün dünyada gerçəkləri daha çox anlatmaqdır. Ermənistanın, ermənilərin Qarabağda, Xocalıda törətdiyi dəhşətləri, soyqırımı türk kökənli bütün insanlar dünyaya daha çox çatdırmalı, yalanlara qarşı gerçəklərlə müzakirəni daha da genişləndirməlidir. Bütün türk dünyası oyanmalı və hazırlanan bu qaralama kampaniyasına qarşı ayağa qalxmalıdır. Sözdə saxta erməni soyqırımı arxasında oynanan bu oyundan xəbərdar olduğumuzu göstərməli və bu yolda mübarizəmizi artırmalıyıq".