Şəmkir rayonunun Çinarlı qəsəbəsində yerləşən tarixi alman tikililəri dövlət tərəfindən mühafizə olunan daşınmaz tarix-mədəniyyət abidələrinin siyahısına daxil edilməyib.

Bu sözləri Axar.az-a Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin mətbuat katibi Fariz Hüseynli deyib.

“Sözügedən tikililərin tarixi abidə qismində qeydə alınması məsələsi Mədəni İrsin Qorunması, İnkişafı və Bərpası üzrə Dövlət Xidmətində nəzərdən keçiriləcək”, - qurum rəsmisi bildirib.

Xatırladaq ki, ötən gün Çinarlı Sosial İnkişaf və Xeyriyyə Birliyi Şəmkir rayonunun Çinarlı qəsəbəsində viran qalmış tarixi alman tikililərinin mühafizəsi ilə bağlı Mədəniyyət Nazirliyinə çağırış etmişdi.