Türkiyənin "Xalq Bank"ı Babək Zəncaninin İrana pul gətirməsinə maneə yaradır.

Axar.az xəbər verir ki, bu sözlər azərbaycanlı milyader Babək Zəncaninin vəkillərinin "Tesnim" agentliyinə təqdim etdiyi sənədlərdə yer alıb. Sənədə görə, martın 3-də İran Mərkəzi Bankı Zəncaniyə öz borcunu qaytarması üçün Türkiyədəki "Xalq Bankı"na aid bir hesab nömrəsi verir. Bundan sonra Zəncani Malaziyada yerləşən "Föst İslamik Bank"dan bu hesaba pul transferi etməyə çalışır, lakin "Xalq Bank" buna icazə vermir. "Xalq Bankı"n xarici məsələlər üzrə nümayəndəsi Əlif Ərcan Sözəri transferi həyata keçirmək üçün Malaziya bankının "OBER Bank"la əlaqə qurmasını və xaricdən yalnız onun vasitəsilə pul aldıqlarını bildirir.

Malaziya bankı "OBER Bank"la əlaqəyə girir, amma bu bank da Zəncaniyə aid pulu götürməkdən imtina edir. Sonradan bankın göndərdiyi məktubda "OBER Bank" nümayəndəsi "Xalq Bankı" ilə əlaqələrinin olduğunu, amma bu xidmətləri yalnız öz müştəriləri üçün təqdim etdiklərini söyləyir.

Zəncaninin vəkilləri məhz buna görə bəzi şəxslərin Zəncanini qəsdən edama göndərdiklərini bildirirlər. Onların fikrincə, bu işdə "Xalq Bankı"n əli var.

Qeyd edək ki, martın 7-də İran məhkəməsi milyarder Babək Zəncaninin edam edilməsi qərarını verib. Zəncani İranın neft pullarının mənimsənilməsində və çirkli pulların yuyulmasında günahlandırılır. Hazırda Zəncaninin 14 milyard dollar sərvəti var. Güney Azərbaycandan olan məşhur milyarder Rza Zərrab onun Türkiyədəki əsas ortağı hesab edilir.

Maraqlı məqam ondan ibarətdir ki, bir müddət öncə rəsmi Tehran Zəncaninin edam qərarının dəyişdirilə biləcəyini söyləyib. Bunun üçün Zəncanidən ölkəyə olan 2,8 milyard dollarlıq borcunun geri qaytarılması tələb olunur.

Zəncaninin vəkilləri də edam qərarından apelyasiya şikayəti verəcəklərini açıqlayıblar.