Ermənistanın Dağlıq Qarabağdakı separatçılara hərbi dəstək verməsi Rusiya tərəfindən hazırda ortaya atılmış bir oyundur.

Bu barədə Axar.az-a açıqlamasında politoloq Qabil Hüseynli danışıb. Sabiq dövlət müşaviri müstəqil dövlət statusuna malik olmayan qondarma DQR-in hər hansı bir müqavilə imzalamaq səlahiyyətində olmadığını bildirib:

"Ermənistan KTMT-nin adından hər hansı bir müqavilə imzalamaq səlahiyyətinə malik deyil. KTMT adından imzalanan müqavilələr buraya daxil olan bütün üzvlər tərəfindən ratifikasiya edilməli və ya onların imzaları ilə təsdiq edilməlidir. Burada ən mühüm faktor da məhz budur. Ermənistan ola bilsin, DQR-lə ikitərəfli müqaviləni KTMT adından yox, öz adı ilə imzalamağa çalışır. Bu müqavilə Rusiyanın tərəfindən hazırda ortaya atılmış bir oyundur. Moskvanın məqsədi bunun vasitəsilə proseslərə gələcək müdaxilələrini guya hüquqi müstəviyə mindirmək istəyir. Əgər Rusiya özü DQR-i tanımırsa, dövlət kimi mövcud olmayan bir qurumla müqavilə imzalamayıbsa, Ermənistanın imzaladığı müqavilə də qeyri-hüquqidirsə, maraqlıdır, Moskva bununla proseslərə necə müdaxilə edilə bilər? Azərbaycan ordusunun hazırda öz ərazisində apardığı əməliyyatlar hücum deyil, özünümüdafiə tədbirləridir. Elə an gələ bilər ki, Azərbaycan hücum tədbirlərinə də əl ata bilər. Bu, tam qanunidir".

Qeyd edək ki, 1992-ci ildə yaradılan Kollektiv Təhlükəsizlik Müqaviləsi Təşkilatına (KTMT) Ermənistan, Belarus, Rusiya, Qazaxıstan, Qırğızıstan və Tacikistan daxildir. 1993-cü ildə isə Azərbaycan, Belarus və Gürcüstan da qoşuldu. Bununla belə, Azərbaycan 1999-cu ildə müqavilənin vaxtını uzatmaqdan imtina edərək təşkilatı tərk edib. Ermənistan bu illər ərzində dəfələrlə Rusiyanı Azərbaycana qarşı Dağlıq Qarabağ mübarizəsinin həllinə dəstəyə verməyə səsləyib. Bir müddət öncə isə Sərkisyan Dağlıq Qarabağdakı separatçı rejimə hərbi dəstək veriləcəyini və bununla bağlı müqavilələr imzalanacağını açıqlayıb.

Aprelin 1-dən 2-ə keçən gecə düşmənlə döyüşlərdə Silahlı Qüvvələrimizin 12 hərbi qulluqçusu şəhid olub. Erməni mövqelərinə aviasiya zərbələri zamanı əməliyyata cəlb olunan 1 ədəd Mi-24 helikopteri düşmən tərəfindən vurulub və 1 ədəd tank mina partlayışı zamanı sıradan çıxıb. Dünən gecə davam edən döyüşlərdə isə 3 şəhid vermişik. Hazırda cəbhə bölgəsində gərginlik davam edir.