Qazaxıstanın Aktauda qəzaya uğrayan təyyarənin registratorlarını deşifrə etmək üçün Braziliyaya göndərmək qərarı müstəqillik, suverenlik və qərəzsizliyin təzahürüdür.

Axar.az “Tenqrinyus.az”a (Tengrinews.kz) istinadən xəbər verir ki, bunu politoloq Eduard Poletayev deyib.

Poletayev qeyd edib ki, nəqliyyat naziri Marat Karabayevin rəhbərlik etdiyi Aktau qəzasının təhqiqat komissiyası məlumat verib ki, Çikaqo Konvensiyasının 13-cü Əlavəsinin standartlarına uyğun olaraq, təhqiqat aparan dövlət uçuş yazılarının oxunmasını təmin edir və qara qutuların oxunması, şifrəsinin açılması üçün ölkənin seçilməsi barədə qərar qəbul edir:

“Qazaxıstan bu konvensiyanı 1992-ci ildə ratifikasiya edib və Beynəlxalq Mülki Aviasiya Təşkilatının üzvüdür. Yuxarıda göstərilən sənədə əsasən, həmçinin Beynəlxalq Mülki Aviasiya Təşkilatının tövsiyələrini, Azərbaycan və Rusiyanın aviasiya hakimiyyət orqanları ilə məsləhətləşmələri nəzərə alaraq, komissiya qara qutuların Braziliyanın Aviasiya Qəzalarının Araşdırılması və Qarşısının Alınması Mərkəzinə göndərilməsi barədə qərar qəbul edib. Bu ölkə həm də “Embraer” təyyarəsinin mənşə ölkəsidir”.

Onun fikrincə, Qazaxıstan təyyarə qəzasının araşdırılmasında obyektivliyin tərəfdarıdır:

“Əslində, deşifrə üçün Braziliyaya uçuş registratorlarının göndərilməsi qərarı Qazaxıstanın müstəqilliyinin, suverenliyinin və qərəzsizliyinin təzahürüdür. Beynəlxalq Mülki Aviasiya Təşkilatının himayəsi altında keçirilən mülki aviasiya baş direktorlarının konfranslarının birində qəbul edilib ki, dövlət öz ərazisi üzərindəki hava məkanında uçuşların, o cümlədən xarici operatorların hava gəmilərinin uçuşlarının təhlükəsizliyinin təmin edilməsinə görə məsuliyyət daşıyır”.

O vurğulayıb ki, dövlətlərin öz ərazilərindəki hava məkanı üzərində suverenliyi prinsipinə və ondan təhlükəsiz istifadəni təmin etmək üçün vasitələri seçmək hüququna baxmayaraq, vahid minimum təhlükəsizlik tələblərinə əməl olunmadan beynəlxalq uçuşların həyata keçirilməsini təmin etmək olmaz:

“CENIPA-nın müstəntiqləri dekabrın 28-də Aktauya gəliblər. Ertəsi gün İlham Əliyev qazax xalqına minnətdarlığını bildirdi. Qasım-Jomart Tokayev təyyarə qəzasında həlak olanların xilas edilməsində göstərdiyi qəhrəmanlığa görə bir sıra vətəndaşları mükafatlandırdı”.