Fevralın əvvəlində Azərbaycan Prezidentinin xarici siyasət məsələləri üzrə köməkçisi Hikmət Hacıyev İrana səfər edib. Burada bir neçə vacib məqam var.

Axar.az xəbər verir ki, bu sözləri rusiyalı politoloq, ermənipərəst Sergey Markedonov sosial şəbəkə hesabında yazıb.

“Əvvəla, Hikmət Hacıyev təkcə Azərbaycan Prezident Administrasiyasında yüksək vəzifə tutan məmur deyil. O, de-fakto ölkənin xarici siyasətinin koordinatorlarından biridir, bir növ xarici işlər supernaziridir.

İkincisi, son illər Tehranla Bakı arasında münasibətlər parlaq olmayıb. İkinci (44 günlük - red.) və Üçüncü (2023-cü il 19-20 sentyabr antiterror əməliyyatı nəzərdə tutulur - red.) Qarabağ müharibələrindən sonra “mübahisəli bölgə”nin (Markedonov hər zaman, hətta işğal illərində belə Azərbaycanın beynəlxalq səviyyədə ərazisi sayılan torpaqları “mübahisəli bölgə” adlandırır – red.) Azərbaycanın yurisdiksiyasına qaytarılmasından sonra İran tərəfi Xəzəryanı respublikanın strateji müttəfiqi olan Türkiyənin güclənməsindən narahat idi.

İran-İsrail qarşıdurmasında tərəflərin fərqli mövqeləri münasibətlərin yaxşılaşmasına kömək etməyib. İslam Respublikası Azərbaycanla yəhudi dövləti arasında əməkdaşlıqdan həmişə narahat olub (hətta açıq şəkildə qıcıqlanıb). Türkiyə ilə İran arasında Suriya ilə bağlı fikir ayrılıqlarını da Azərbaycan-İran ikitərəfli gündəmi üçün müsbət hadisə adlandırmaq olmaz. Təbii ki, 2023-cü ilin yanvar faciəsi (Azərbaycanın İrandakı səfirliyinə qarşı törədilmiş terror aktı) həm Tehran, həm də Bakı üçün ciddi sınaq oldu.

Buna baxmayaraq, hər iki tərəf praqmatik ikitərəfli gündəliyin saxlanmasında həmişə qarşılıqlı maraq göstərib.

2025-ci ilin fevralında Hacıyev nə aldı? Onun Tehran səfərinin nəticələrini necə qiymətləndirmək olar?

İlham Əliyevin köməkçisi bir sıra mühüm görüşlər, o cümlədən Prezident Məsud Pezeşkian və xarici işlər naziri Abbas Arakçı ilə danışıqlar apardı, Bakıya səfərə dəvət çatdırıldı, məqama uyğun sözlər deyildi. Deməli, normallaşma uğurludur və onun dönməzliyindən danışmaq olar? Hər şey o qədər də sadə və aydın deyil.

Prezident Pezeşkianın Qafqaz regionu ölkələrinin ərazi bütövlüyünün qorunmasının ölkəsinin xarici siyasətinin fundamental prinsipi olduğunu vurğulaması da müşahidəçilərin diqqətindən yayınmadı. İrəvanda bu, dərhal bir növ siqnal kimi qiymətləndirildi: Tehran Azərbaycanla sərhədin demarkasiyası prosesinin Ermənistanın maraqlarına zidd olaraq aparılmasına imkan verməyəcək. Və Zəngəzur dəhlizinin zorla “açılmasına” imkan verməyəcək.

Lakin Tehran üçün ənənəvi olan bu cür bəyanatlar həm də daxili auditoriyaya ünvanlanır. İran hakimiyyətinə göstərmək lazımdır ki, “islahatçı” reputasiyasına baxmayaraq, barmaqları “nəbzin üstündədir”, milli maraqları qorumağa hazırdırlar və Livan və Suriyada başlayan geriçəkilmə total deyil, hələ “barıt içində barıt” var”, - Markedonov qeyd edib.