İyunun 13-də Roma şəhərində keçirilmiş İqtisadi əməkdaşlıq üzrə Azərbaycan-İtaliya Hökumətlərarası Komissiyasının 4-cü iclası və biznes forum İtaliya kütləvi informasiya vasitələrində geniş işıqlandırılıb.

Axar.az xəbər verir ki, İtaliyanın "ANSA" dövlət xəbər agentliyi, "Agenzia Nova", "Il Velino", "Aska News" agentlikləri, "Notizie Geopolitiche" analitik-informasiya portalı, habelə digər kütləvi informasiya vasitələri tədbirlə bağlı ətraflı məlumatlar yayıblar.

İtaliya KİV-i tədbirdəki çıxışlara, xüsusən də xarici işlər naziri Paulo Centiloni, Nazirlər Şurasının katibi Klaudio De Vinçenti, xarici işlər nazirinin müavini Benedetto della Vedovanın çıxışlarından fikirlərə yer verib. Yaxın aylarda İtaliya xarici işlər nazirinin Azərbaycana səfər edəcəyi, iki ölkə arasında bütün sahələrdə sıx əlaqələrin və tərəfdaşlığın mövcud olması, Azərbaycanın Avropa ilə Asiya arasında körpü kimi mühüm geosiyasi coğrafi mövqe tutması, TAP layihəsinin ölkələr arasındakı münasibətlərə yeni dinamika gətirəcəyi diqqətə çatdırılır. İtaliya tərəfinin Azərbaycan-Avropa İttifaqı əlaqələrinə münasibətdə mövqeyi, eləcə də İtaliyanın Ermənistan-Azərbaycan münaqişəsi ilə bağlı ATƏT-in hazırkı sədri olan Almaniyanın münaqişənin həlli istiqamətində səylərini dəstəklədiyi, 2018-ci il üzrə ATƏT-in sədri seçkilərində uğur qazanacağı halda İtaliyanın da bu istiqamətdə öz səylərini əsirgəməyəcəyi bildirilir. Məlumatlarda Hökumətlərarası Komissiyanın həmsədri, Azərbaycanın energetika naziri Natiq Əliyevin də fikirlərinə yer verilir.