Paytaxtın Xətai rayonu Nobel prospektində təmir olunan yol yenidən çöküb.

"Xəzər Xəbər"in məlumatına görə, Avtomobil Yolları Dövlət Agentliyinin və Azərsu Açıq Səhmdar Cəmiyyətinin əməkdaşları həmin ərazini qazıb müəyyən işlər görərək sonradan yola asfalt örtüyü vurmuşdular. Bu gün isə həmin hissə yenidən çöküb.

Maraqlı məqam ondan ibarətdir ki, Nobel prospektindən üzü şəhər istiqamətinə hərəkət edən avtomobillərin sürücüləri yolda heç bir təhlükəsizlik tədbirlərinin görülməməsi səbəbindən çökən hissəni görmür, lap yaxınlaşdıqda isə çalaya düşməmək üçün anidən əyləc sistemindən istifadə etməli olur. Bu zaman isə arxadan gələn maşınların qabaqdakı avtomobili vurmaq risqini artırır.

Elə çəkiliş zamanı həmin ərazidə 6-ya yaxın avtomobilə ciddi zərər dəyməsi ilə nəticələnən yol qəzası baş verib. Bəzi avtomobillər isə çökən hissəyə düşərək yollarına davam edirdilər.

Məsələ ilə bağlı Avtomobil Yolları Dövlət Agentliyi ilə əlaqə saxlayandan sonra əraziyə qurumun əməkdaşları gələrək yolda təhlükəsizlik tədbirlərinin görməsinə başlayıb.

Qeyd edək ki, verilən açıqlamda yolun çökməsinə səbəb kimi su sızması göstərilir.