Prezident İlham Əliyev və xanımı Mehriban Əliyeva ilə dünən anım mərasimi zamanı qısa dialoqumuz oldu. Söhbətimiz çox qısa çəkdiyi üçün kino, sənət barədə danışmadıq. Ancaq mənim üçün çox xoş oldu ki, Prezident də, xanımı da görüş üçün özləri mənə yaxınlaşdılar.

Bu sözləri Kult.az-a xalq artisti, sevilən aktyor Rasim Balayev ötən gün ümummilli lider Heydər Əliyevin anadan olmasının 96-cı ildönümünə və Heydər Əliyev Fondunun yaradılmasının 15 illiyinə həsr olunmuş təntənəli mərasim zamanı Prezident İlham Əliyev və xanımı Mehriban Əliyeva ilə baş tutan görüşü barədə danışarkən deyib. R.Balayev bildirib ki, mərasim bitəndən sonra Prezident və xanımı ilk olaraq sənət adamlarının əyləşdiyi masaya yaxınlaşıb:

“Sənət adamları, ölkənin sayılıb-seçilən şəxsiyyətlərinin əksəriyyəti orda idi. Mərasim bitəndən sonra Prezident və xanımı ilk olaraq sənət adamlarının əyləşdiyi masaya yaxınlaşdı. Onlar təkcə sənət adamları ilə görüşdülər və sonra mərasimi tərk etdilər. Tahir Salahov, Zeynəb Xanlarova, Eldar Quliyev, Alim Qasımov, Arif Babayev... hamımız bir masada əyləşmişdik. Hamımızla görüşdü. Bu çox xoş təsir bağışladı mənə. Prezident də, xanımı da bildirdi ki, şəxsən məni orada görmək onlar üçün xoşdur. Özü şəxsən bildirdi ki, sizə daim diqqət var. Aramızda qısa da olsa, səmimi bir söhbət baş tutdu. Söhbətlə və görüşlə bağlı təəssüratım olduqca yüksəkdir. Prezidentlə aramızda baş tutan o dialoqdan bu anlaşıldı ki, bizim hələ sənət, bu sahədəki problemlər barədə Prezidentlə görüşlərimiz çox olacaq”.

Xatırladaq ki, ötən gün ümummilli lider Heydər Əliyevin anadan olmasının 96-cı ildönümünə və Heydər Əliyev Fondunun yaradılmasının 15 illiyinə həsr olunmuş təntənəli mərasim keçirilib. Mərasim zamanı Prezident İlham Əliyev və xanımı Mehriban Əliyeva xalq artisti Rasim Balayevlə görüşüb, söhbət ediblər.