İki top irəlidə olan "Benfika" işin həll olunduğunu düşünüb, təzyiqi azaltdı. Temp aşağı düşdü və rəqib komanda geri çəkilərək nəfəs dərməyə, əks-hücumlara bel bağladı. Bu isə bizim xeyrimizə oldu.

Axar.az xəbər verir ki, bu sözləri idman eksperti Kənan Məstəliyev “Qarabağ”ın dünənki qələbəsi (2:3) ilə bağlı deyib.

“Komanda toparlanaraq kombinasiyalar qurmağa başladı. Cinahlar işləmədiyi üçün ortadan qısa ötürmələr və fərdi ustalığa güvəndik. Fasilədən sonra Duran dəqiq oynayanda rəqib çaşdı. Bruno Lajinin əvəzetmələri nəticə vermədi. Meydan sahibləri üstünlüyü artırsa da, Qurban Qurbanov təmkinini qorudu və vaxtını gözlədi. Sonra Addaini meydana buraxaraq hücumda top saxlamağı və basqı yaratmağı təmin etdi. Kadi sağa, Zubir ortaya keçdi. Amma Yankoviçin zədəsi planı pozdu”, - o bildirib.

Məstəliyev qeyd edib ki, Qurban Qurbanov hesabı qorumaq əvəzinə risk edib, Bikalyonu dayaq, Borgesi mərkəzə çəkdi, cinaha Kaşuku buraxdı:

“Kreativlik artdı, Alekseyin qolu isə qələbəni təmin etdi. Son dəqiqələrdə xüsusilə Bəhlulun fədakar oyunu tarixi nəticə gətirdi. Zubir yaxşı oynayanda, “Qarabağ” da yaxşı oynayır. Yorğun görünsə də, meydanın ən çox qaçan futbolçusu idi – təxminən 13 km qət etdi.

Qurban Qurbanov möcüzə edir, amma hər şeyi ona yükləmək doğru deyil. Əsas olan “Qarabağ”ın qələbəsidir. Oynamağa stadionu olmayan futbolumuzun gələcək ümid və inam yeri, ən etibarlı istinad nöqtəsi məhz “Qarabağ”dır”.