Kədərli məğlubiyyətdir. “Qarabağ” pley-offa qədər çox yaxşı oyunlar keçirmiş və çox güclü rəqiblərlə başabaş oynamış, onları məğlub etmiş komandadır.

Bu sözləri idman eksperti Kənan Məstəliyev Axar.az-a açıqlamasında “Qarabağ”ın Çempionlar Liqasının pley-off mərhələsində İngiltərənin "Nyukasl Yunayted" komandasına Bakıda ötən gün 6:1 hesabı ilə məğlub olması barədə danışarkən deyib.

Ekspert bildirir ki, “Nyukasl” favorit və güclü komanda olsa da, fərqin bu qədər böyük olacağı proqnozlaşdırılmırdı:

“Reallığa baxanda belə olmalı deyildi. “Qarabağ” sadəcə təcrübəsizliyin qurbanı oldu. Baş məşqçi Qurban Qurbanov da, futbolçular da bu səviyyədə matçlara hazır deyillər. Bunu qəbul etmək lazımdır. Günah bəlkə də onların özündə deyil. Çünki “Qarabağ” Azərbaycan futbolunun çox üzərində olan nəticələrə nail olub. Sistemi, israrı, prinsipləri hesabına buralara qədər gəlib. “Qarabağ”a təşəkkür düşür”.

Onun sözlərinə görə, bundan sonra Azərbaycan futbolunda təkcə “Qarabağ” yox, bütün komandalar inkişaf etməlidir:

“Yəni biz meydançaları, uşaq futbolunu, sistemi, infrastrukturu düzəltməliyik. Azərbaycan futbolu təkcə “Qarabağ”dan ibarət olmalı deyil. Azərbaycan çempionatını düzəlməyənə qədər Çempionlar Liqasında pley-off mərhələsindən o tərəfi görmək ehtimalımız yoxdur.

“Qarabağ” böyük hesabla məğlub oldu. Lakin kədərlənmək yox, reallığı qəbul etmək lazımdır. Başa düşməliyik ki, Azərbaycan futbolunun maksimumu bu qədərdir. Səhvləri analiz etmək, nəticə çıxarmaq və gələcəyə inamla baxmaq lazımdır”.