Moskva "Dinamo"sunun azərbaycanlı futbolçusu Ülvi Babayev Rusiya və Azərbaycan milli komandaları arasında seçimindən danışıb.

Axar.az Qol.az-a istinadən xəbər verir ki, "myachrus"a danışan gənc yarımmüdafiəçi Rusiya millisində çıxışını dəyişməz qərar kimi qiymətləndirib:

"Seçimim Rusiyadır və bu mövqe dəyişməzdir. Rusiya futbolunun hazırda təcrid şəraitində olmasına rəğmən, verdiyim qərara görə peşman deyiləm. Bu mövzuda Rusiya Futbol İttifaqı və ya Valeri Karpinin məşqçilər heyəti ilə hər hansı müzakirəmiz olmayıb".

Gənc oyunçu vətəndaşlığını dəyişmək barədə düşünmədiyini vurğulayıb:

"Mən Ximkidə doğulmuşam və bütün ömrüm boyu Rusiyada yaşamışam. Vətəndaşlığı dəyişmək fikri ağlımdan belə keçməyib. Atama, anama, ailəmə və bütün qohumlarıma böyük hörmətlə yanaşıram, lakin mən Rusiyada tərbiyə almışam və burada böyümüşəm. Hesab edirəm ki, seçim etmək hüququm var və buna görə də Rusiya millisini seçmişəm".

Vətəndaşlığını dəyişəcəyi təqdirdə Rusiya Premyer Liqasında legioner sayılacağı və bunun işini çətinləşdirə biləcəyi ilə bağlı suala futbolçunun cavabı belə olub:

"Düzünü desəm, bu barədə heç düşünməmişəm. Yəni, legioner olsam, rəqabət çətinləşər kimi hesablamalar aparmamışam. Sadəcə olaraq özümü bu ölkəyə aid hiss etdiyim üçün bu addımı atmışam".

Qeyd edək ki, daha öncə də Ü.Babayev seçiminin Rusiya millisindən yana olacağını açıqlamışdı. Hansı ki, AFFA da onun Azərbaycan millisinə cəlb olunmasında maraqlı idi.