Ümummilli Lider Heydər Əliyevin 103-cü ildönümünə həsr edilən avarçəkmə və kanoe üzrə Prezident Kuboku-2026 beynəlxalq reqatası başa çatıb.

Axar.az xəbər verir ki, “Kür” Olimpiya Tədris-İdman Mərkəzində keçirilən son yarış günündə idmançılarımız 1 qızıl, 1 gümüş, 2 bürünc olmaqla 4 medal qazanıblar.

İkinəfərlik kayak qayığında 2008-2009-cu il təvəllüdlü idmançılar arasında 200 metr məsafəyə yürüşdə Tengiz Qaqnidze - Qiyas Əhmədov cütü qızıl medala layiq görülüb.

Eyni yürüşdə Niyaz Məlikov - İvan Vorobyanski cütü ikinci yer tutub. Sənan Cəfərzadə ilə Tahir Mövsümov 2010-2011-ci il təvəllüdlü idmançılar arasında ikinəfərlik kayakda 1000 metr məsafəyə yarışda üçüncü yerə layiq görülüblər.

Komandamıza daha bir medalı ikinəfərlik akademik avarçəkmədə 1500 metr məsafəyə yürüşdə Azər İlyasov - Tunar Məmmədzadə cütü qazandırıb. Onlar 2008-2009-cu il təvəllüdlü idmançıların mübarizəsində fəxri kürsünün üçüncü pilləsinə qalxıblar.

Beləliklə, Azərbaycan komandası “Prezident Kuboku-2026” beynəlxalq reqatasını 2 qızıl, 3 gümüş, 4 bürünc olmaqla, 9 medalla başa vurub.

20-dək ölkədən 100-dən artıq idmançının mübarizə apardığı reqatada komanda hesabında Gürcüstan həm akademik, həm də kanoe növündə kuboka sahib olub.

Xatırladaq ki, “Prezident Kuboku 2026” beynəlxalq reqatası Cənab Prezident Prezident İlham Əliyevin tapşırığı ilə ilk dəfə Sərsəng su anbarından başlayıb. Yarışlar Suqovuşan və Mingəçevirdə davam edib.