Xalq artisti Emin Ağalarov Formula-1 Azərbaycan Qran-Prisinin gələcəkdə Bakının mərkəzindən “Sea Breeze” ərazisinə köçürülməsi ehtimalı haqda video paylaşıb.

Axar.az Axşam.az-a istinadla xəbər verir ki, müğənni paylaşdığı videoaçıqlamada bununla bağlı işlərə başlanıldığını bildirib.

Emin deyib ki, uzun müddətdir sahibi olduğu yaşayış kompleksində Formula-1 yarışı üçün xüsusi trasın inşa olunacağı ilə bağlı müzakirələr aparılır. Onun sözlərinə görə, layihənin reallaşdırılması üçün Formula-1 traslarının layihələndirilməsi ilə məşğul olan şirkətlə də əlaqə yaradılıb.

E.Ağalarov qeyd edib ki, 2030-2031-ci illərə qədər trasın və ətraf infrastrukturun tikintisi mümkün olarsa, Formula-1 yarışlarının “Sea Breeze”də keçirilməsi nəzəri olaraq mümkündür:

“Hazırda bununla bağlı konkret razılaşmalar yoxdur. Amma bizim belə bir arzumuz var. Arzu etdiyimiz hər şey reallaşıb. Ona görə də “Sea Breeze”də Formula-1 uzaqda deyil”.

Emin həmçinin oyunların həmin ərazidə necə görünə biləcəyi görüntülərini də yayımlayıb.