Braziliya millisinin və "Real Madrid"in sabiq futbolçusu Roberto Karlos idman karyerasını başa vurduqdan sonra üzləşdiyi maliyyə problemləri barədə danışıb.

Axar.az xəbər verir ki, bu barədə "Record" nəşri məlumat yayıb.

O bildirib ki, böyük futbolla vidalaşmağa qərar verdiyi an artıq idman direktoru kimi fəaliyyət göstərmək üçün lisenziyası var idi və müxtəlif markalarla işləyirdi:

“Bank hesabımı sıfırlayan şəxslərlə ciddi sıxıntılar yaşadım. Menecerlər və ailədaxili münaqişələr səbəbindən futboldan əldə etdiyim bütün gəlirin 99%-ni itirdim. Müəyyən yanlışlıqlara yol verdim və indi gənc futbolçulara eyni səhvləri etməmələrini məsləhət görürəm”.

Xatırladaq ki, 2025-ci ilin yanvarında keçmiş futbolçu 2009-cu ilin iyununda ailə həyatı qurduğu Mariana Lukkon ilə boşanma mərhələsinə qədəm qoyub. Həmin ərəfədə məşhur idmançının sərvətinin 162 milyon dollar civarında olduğu bildirilirdi.