Portuqaliya Premyer Liqasında XV turun növbəti oyunları keçirilib.

Qol.az-ın məlumatına görə, millimizin üzvləri Kamran Ağayevlə Emin Mahmudovun çıxış etdiyi "Boavişta" bu gün səfərdə "Nasional"la qarşılaşıb. Matç "Boavişta"nın 2:0 hesablı qələbəsi ilə başa çatıb.

Millimizin futbolçuları K.Ağayev və E.Mahmudov start heyətdə meydana daxil olublar.

İlk dəfə əsas heyətdə yer alan E.Mahmudov görüşün 11-ci dəqiqəsində hesabı açıb. Bu, onun Portuqaliya liqasında ilk qolu olub. Millimizin futbolçusu 39-ci dəqiqədə sarı vərəqə ilə cəzalandırılıb. E.Mahmudov qarşılaşmanın 62-ci dəqiqəsində zədələnərək meydanı erkən tərk edib.

K.Ağayev isə 90 dəqiqə meydanda olub və 68-ci dəqiqədə sarı vərəqə ilə cəzalandırılıb.

E.Mahmudov oyunun ən yaxşısı seçilib.

Qeyd edək ki, "Boavişta" 15 turdan sonra 17 xalla turnir cədvəlində 14-cü pillədən 9-cu pilləyə yüksəlib.