Axar.az-ın bugünkü qonağı doqquz qat dünya çempionu, üç dəfə dünya kubokun sahibi və Avrasiya çempionu Emil Hacıyevdir.

Onunla müsahibəni təqdim edirik.

- Emil bəy, idmana həvəs sizdə necə yarandı?

- Orta məktəbin 5-ci sinfində oxuyarkən idmanın sərbəst güləş növünə böyük həvəs göstərdim. Atam Azərbaycanın Əməkdar idman müəllimi, Azərbaycan bədən tərbiyyəsi və idman xadimidir. O, həm də mənim məşqçim idi. Pis də alınmadı. Güləş üzrə uğurlu nəticələrim oldu. Dəfələrlə beynəlxalq turnirlərin qalibi oldum. 2003-cü ilə qədər sərbəst güləşlə məşğul oldum. O ildən sonra qərar verdim ki, keçim uşu-sando döyüşünə və yenə də uğurlarım göz önündədir.

- Uşu-sando üzrə müəlliminiz kim idi?

- Uşu-sando üzrə ilk müəllimim Canpolad Budaqov olub. Azərbaycanda bu idman növünün təməlini qoyanlardan biridir. Canpolad müəllim Azərbaycanın əfsanəvi idmançısıdır.

- İlk dəfə dünya çempionu adını neçənci ildə qazanmısınız?

- 2005-ci ildə İtaliyada qızıl medal qazandım və bu uğurlarım növbəti illərdə davam etdi. Azərbaycanın bayrağını ölkə prezidenti və idmançılar qaldırıb dalğalandırır. İnanın ki, bu bizim üçün böyük bir şərəfdir. Əlimizdən gələni edirik ki, Azərbaycan bayrağını beynəlxalq tədbirlərdə qaldıraq.

- Həmin döyüşdə sizin rəqibiniz kim idi?

- İlk dünya çempionatında üç döyüş keçirtdim. Birinci rəqibim Belorusiya, ikinci Fransa və üçüncüsü İtaliya idmançısı idi. İtaliya idmançısı həddindən artıq təcrübəliydi. Artıq o bir neçə dünya çempionatında öz qüvvəsini sınamışdı. Lakin buna baxmayaraq, müəllimlərim, federasiyamızın prezidenti və atam başa salmışdı ki, yarışa getdinsə, özünü itirmə. Həmin məqamda rəqibi, ölkəni və bayrağı düşünmək lazımdır ki, onlar bizim üçün müqəddəsdir. Ümumiyyətlə, bizim ailə idmançılardan ibarətdir. Qardaşım sərbəst güləş üzrə idman ustasıdır, atam da 48 ildir ki, idmanla məşğuldur. 2011-ci ildən Gənclər və İdman naziri cənab Azad Rəhimov tərəfindən sərbəst güləş və uşu-sando üzrə Əməkdar idman ustası adına layiq görülmüşəm. Hal-hazırda profilimi dəyişib Kinq-boksinq federasiyasına keçmişəm. Həmin federasiyanın prezidenti hörmətli millət vəkili Adil Əliyevdir. Biz onunla fəxr edirik, çox gözəl insandır. Bu ilin oktyabrının 18-i və 22-i İspaniyanın Madrid şəhərində kinq-boksinq üzrə Avropa çempionatıdır və bizim də çalışdığımız odur ki, İspaniyadan Azərbaycana medal gətirək.

- Emil bəy, 9 dəfə dünya çempionu olmaq böyük nailiyyətdir...

- İnanın, hər dəfə nailiyyət artdıqca məsuliyyət bir az da artır, hamının gözü səndə olur. Bu, elə bir hissdir ki, məsuliyyəti daha da artırır. Yəni əgər bir az xəstələndinsə, ağrıdınsa, qızdırman qalxdısa, artıq medal əldən çıxır. Biz yarışlara hazırlaşanda ən azı 6-7 ay, bəzən hətta 1 il vaxt sərf edirik. Həmin bir ilin zəhmətini bir-iki gün həll edir. Yəni əgər həmin müddətdə xəstələndinsə, bir ilin hədər gedir.

- Qeyd etdiniz ki, Əməkdar idman xadimi adına layiq görülmüsünüz. Bu gün elə bir tələbəniz varmı ki, ondan nəsə gözləyəsiniz? Yəni o, gələcəyin Emil Hacıyevi ola bilərmi?

- Bəli, artıq mənim dünya və Avropa çempionu tələbələrim var ki, artıq beynəlxalq arenalarda öz sözlərini deyir, Azərbaycana medallarla gəlirlər. Bu, çox sevindirici haldır, millətimiz üçün gələcək əsgərlər yetişdirilir.

- Bildiyim qədər, dördüncü dəfə dünya çempionu olduqdan sonra, idmandan getmək istəmisiniz. Bir az bu haqda danışaq.

- İdman sahəsində getdikcə yüksələndə, nailiyyətlər çoxaldıqca dəstək, qayğı görməyəndə, hardasa insan inciyib-küsür. Ölkənin bayrağını qaldır, himnini səsləndir və nəticədə yetərincə dəyər verilməsin. Artıq 7-8 ay idi ki, məşq eləmirdim, fikrimi tam dəyişmişdim. Marağımı sırf başqa bir sahəyə yönləndirmişdim. Dostum, tələbəm, rejissor Kənan Mahmudov məni qoymadı. Dedi, idmandan ayrılmaq olmaz, bu sənin sahəndir və sən idmanda hələ çox uğurlar əldə edəcəksən. Mən də onu dinlədim, davam etdim. Artıq üstündən illər keçib, nailiyyətlərim artıb və görürəm ki, Kənanı dinləməkdə doğru etmişəm. Mənim idman karyeramda Kənanın böyük rolu var və bu, danılmazdır.

- Dəfələrcə dünya çempionu olan Emil Hacıyevə verilən dəyər onu qane edirmi?

- İstəməzdim bu haqda nəsə deyim. Lakin bizim cənab Prezidentin idmana olan siyasətindən çox razıyam. Bizim üçün çox sevindirici haldır ki, 2015-ci ildə Avropa Olimpiadası Azərbaycanda olacaq. Bu, idmançılarımız üçün bir bayramdır. Hansı idman növü olursa-olsun. Əsas əldə olunan naliyyətlərdir.