Bu gün Azərbaycanda bir futbol bayramı, futbol şöləni var. "Neftçi"dən sonra ilk dəfə "Qarabağ" Avroliqanın qrup mərhələsində tarixi görüşünə çıxır. Hər kəsin nəzərləri Ağdam təmsilçisinin Fransa "Sent Etyen"i üzərində qələbəyə köklənib. Artıq bu tarixi matça saatlar qalır. Bakı vaxtilə 21:00-da qarşılaşmanın ilk düdüyü səslənəcək.

Axar.az bu qarşılaşmaya qədər "Qarabağ" düşərgəsindən ən son xəbərləri çatdırıb. Artıq son xəbər komandamızın qələbəsini böyük həvəslə oxuculara çatdırmaq arzusudur. Hamı kimi biz də işğal olunmuş gözəl diyarımızın adını daşıyan "Qarabağ"ın zəfərini gözləyirik.

***

"Bu gün Azərbaycanda futbol bayramıdır. Çünki "Qarabağ" Avropa Liqasının qrup mərhələsində ilk oyununa çıxacaq. Komandamızdan ən azı heç-heçə gözləyirik. Qələbə qazansaq, əla olar".

Bu sözləri Qol.az-a açıqlamasında milli komandamızın məşqçisi Mahmud Qurbanov deyib.

Veteran futbolçu "Sent Etyen"in çox ciddi rəqib olmasını vurğulamaqla yanaşı komandamızın yaxşı nəticə qazanacağına inandığını bildirib:

"Nəzərə almalıyıq ki, "Sent Etyen" Avropanın ən güclü beş futbol ölkəsindən biri olan Fransanın klubudur.
Bu ölkələrin komandaları yerli çempionatda hansı pillədə olmasından asılı olmayaraq, yaxşı formada olurlar. "Qarabağ" da öz gücünü Avroliqa oyunlarında göstərib. Düşünürəm ki, doğma meydan və azarkeş amili komandamıza kömək olacaq".

Qeyd edək ki, Etopaz.az da proqnozlara görə "Qarabağ" – "Sent Etyen" oyununun əmsallarında dəyişiklik edib. Ağdam klubunun qələbəsinin əmsalı daha da artaraq 3.4-ə çatıb. Bu əmsal dünən 3.2 idi.