Oktyabrın 10-da keçiriləcək İtaliya - Azərbaycan matçının hakimləri müəyyənləşib. Palermo şəhərində baş tutacaq oyunu türkiyəli hakimlər briqadası idarə edəcək. Bu hakimlər "Partizan" – "Neftçi" görüşünü də idarə ediblər.

Axar.az xəbər verir ki, Matçın baş hakimi Hüseyin Göçek olacaq. Ona Mustafa Eyisoy və Orkun Aktaş köməklik edəcəklər. Serkan Ok isə dördüncü referi funksiyasını yerinə yetirəcək.

***

İtaliya və Xorvatiya kimi komandalarla görüş ərəfəsində yığmamız yenə itki verib. Millimizin üzvü Ruslan Əmircanov zədələndiyi üçün onun adı millinin heyətindən çıxarılıb. Bundan əvvəl Ruslan Abışovun adı eyni səbəbdən heyətdən çıxarılıb.

Qeyd edək ki, oktyabrın 10-da keçiriləcək İtaliya - Azərbaycan oyunu Bakı vaxtı ilə saat 23:45-də başlayacaq.

Azərbaycan milli komandasının baş məşqçisi Berti Foqtsun isə mətbuat konfransı oktyabrın 9-da Bakı vaxtı ilə saat 15:30 başlayacaq. Tədbir "NH Palermo Hotel"də baş tutacaq.

***

İtaliya milli komandasının baş məşqçisi Antonio Konte isə Mario Balotellini yığmamızla oyuna çağırmamasının səbəbini açıqlayıb. Təcrübəli mütəxəssis bunu "Liverpul"un hücumçusunun hazırda istənilən formada olmaması ilə əlaqələndirib: "Balotelli İngiltərədə yeni macəraya başladı.

"Liverpul"a uyğunlaşması üçün zamana ehtiyacı olduğunu düşünürəm. Onu yaxından izləyirik. Ayrı-seçkilik etmədim. Sadəcə seçimim belə oldu. Qraziano Pelleyə gəldikdə isə o, son iki mövsümdə 50 qol vurmaqla millidə oynamağa haqq qazandı. Onun Hollandiya çempionatından sonra İngiltərə Premyer Liqasında da ulduzu parlayır".