Avropa Liqasının qrup mərhələsinin ikinci oyununda "Anderlext"i qəbul edən "Qarabağ" rəqibini məğlub yola salıb.

Sport7.az xəbər verir ki, Riçard Almeydanın ilk hissədə vurduğu yeganə qol belçikalılarla oyunda həlledici olub.

Oyundan sonra təşkil olunan mətbuat konfransında çıxış edən ağdamlıların baş məşqçisi Qurban Qurbanov qələbəni şərh edib:

"Dünən də sonadək mübarizə aparacağımızı düşünürdüm. Hər bir oyunçudan razı qaldım. Rəqibin heç bir nöqsanı yox idi. Çox sürətli oynayırdılar. Qrupumuzda bütün rəqiblər bir-birindən güclüdülər. Dünən suallardan da hiss edirdim ki, siz də həyəcanlısız. Hamını sevindirdiyimiz üçün xoşbəxtik. Şehiçin üzərinə çox gedilir. Belədə istənilən adam öz istedadını itirər. Bu mövzuya bir də qayıtmayaq. Yetərincə potensialı var. Ümumən yaxşı qapıçıdır. Hər birimiz ona güvənməliyik. Meydançanın durumu da ötən qarşılaşmadan daha yaxşı idi. Hətta bizə faydası oldu. 90 dəqiqə eyni tempdə oynamaq mümkün deyil. Etiraf edirəm ki, bəzi anlarda daha çox top saxlamağa çalışdıq. Güc nisbətinə real baxmalıyıq. Bakıdakı oyunlarda istək və azarkeşlərin dəstəyi ilə güclü rəqibləri üstələməyə çalışırıq. Həyatda mümkünsüz heç nə yoxdu.İlk hissəni qalib gəlib, oyunu uduzmağa da razı idim.Klub olaraq addım-addım irəli getməyə, böyüməyə çalışırıq. "Qəbələ"yə "Krasnodar"la oyunda uğurlar arzu edirəm".