"Axar.az" virtual məkanda, sosial şəbəkələrdə populyar olan insanlarla "müsahibə-müsabiqə" layihəsini davam etdirir. Bildirdiyimiz kimi, layihənin sonunda sosial şəbəkədə ən çox paylaşılan və Feysbukun "1 nömrə"si olduğunu isbatlayan müsahibimiz mükafatlandırılacaq.

Layihənin bu dəfəki qonağı Feysbuk sosial şəbəkəsində populyar olan reper "Kabus"dur. Müsahibəni təqdim edirik.

- Necə oldu ki, rep həvəsin yarandı?

- 8 ilə yaxın müddətdir ki, replə məşğulam. Amma tam professional şəkildə məşğul olmurdum. Lap əvvəldən şeirlər yazırdım. Sonra gördüm ki, bu sözlər musiqi üzərində daha yaxşı görünür. Yazdıqlarımı öncə özüm bəyəndim və yazmağa davam etdim. Bir də gördüm ki, davamlı olaraq rep yazıram.

- 8 ildə neçə musiqi yazmısan, əsas mövzun nədir?

- Sayını dəqiq deyə bilmərəm. Çünki hələ səsyazmaya alınmamış mahnılar çoxdur. İlk replərim təbii ki, o qədər də təsirli görünmür. Çünki uşaq beyni ilə yazılan sözlərdir. Düzü, bir müddət repə fasilə verdim, amma sonra gördüm ki, apardığım mübarizədə rep mənim üçün ayrı bir cəbhədir. Mənim etirazım birbaşa Azərbaycan cəmiyyətinədir. Bütün uğursuzluqlarımızın, məğlubiyyətlərimizin və çatışmazlıqların əsas səbəbkarı xalqın özüdür. Bizim insanımızın içində bir qorxu var. Bu qorxu insanı zəif bir məxluqa çevirir.

- Sənin replərində radikallıq hiss olunur. Bu, nə ilə bağlıdır?

- Məncə, Azərbaycanda yaşayıb sakit təbiətli insan olmaq ümumiyyətlə mümkün deyil. Bu ölkə müasirliklə köhnəliyin ortasında qalıb. Kütləvi savadsızlıq, təhsilsizlik və sağlam düşüncənin olmaması insanların işini çətinləşdirir. Bu ölkədə əsəblər tarıma çəkilir. Televizora baxıb, radioya qulaq asıb, qəzetləri oxuyub əsəbiləşməmək mümkün deyil.

- Digər reperlərlə münasibətin necədir?

- Mən keyfiyyətli iş görən hər kəsə hörmət edirəm. Azərbaycanda da yetərincə belə insan var. Amma məncə, replə daha doğru və lazımlı olan şeylər təbliğ oluna bilər. Rep bu gün əvvəlki illərlə müqayisədə daha çox sevilir. Reperlər də bundan düzgün istifadə etməlidirlər. Mən bu imkandan yararlanmağa çalışıram. Təəssüf ki, gəncləri mübarizəyə səsləyib, sonradan geriyə çəkilərək, onların içindəki üsyanı öldürənlər də çox olub. Buna görə də hər kəs inanacağı insanı yaxşı tanımalıdır.

- Azreplə münasibətin elə də yaxşı deyil, deyəsən...

- Yox, mənim azreplə problemim yoxdur. Ümid edirəm ki, azrepin də mənimlə problemi olmaz.

- Fevralın 16-da baş tutacaq konsertinın adı Ergenekondur. Bu ad hardan gəlir?

- Bu konsertin adının Ergenekon olması təsadüfi deyil. Mən insanların içində ölən əsl sevgini, mübarizə ruhunu yenidən diriltmək istəyirəm. İnsanlar öz dəyərlərindan, həqiqətlərdən uzaqdırlar. Sanki bir mağaraya qaxılıb qalıblar. Getməli olduqları yolu unudublar. Mən insanların fərdi azadlıqlarına çatmalarını istəyirəm. Mən onları Ergenekona dəvət edirəm. Mağaradan çıxmaq vaxtıdır artıq.

- Türkçüsən?

- Mən türkəm və bir türk kimi yaşayıram.

- Ergenekon sənin üçün nə deməkdir?

- Ergenekon mənim millətimin yenidən doğulmasıdır. Mən xalqın indiki vəziyyətini o dövrlə müqayisə edirəm. Məncə, biz bu milləti yenidən yaratmalıyıq.

- Səncə, bu, çox böyük iddia deyil?!

- Bu, mənim yolumdur və bu yol məndən iddialı olmağı tələb edir. Böyük iddialar insan üçün ağır yükdür. Hər kəs bu yükü daşımağa hazır olmalıdır.

- Sənə elə gəlmir ki, "mən" sözünü çox işlədirsən?

- Bəli, çünki "mən" təkcə Kabus, ya Həbib demək deyil. Mən - mübarizə aparan hər kəsdir. Bizik. Biz isə ölkənin çıxış yoluyuq.

- "Biz" deyəndə, kimi və nəyi nəzərdə tutursan?

- Öncəki cavabımda dediyim kimi, mübarizə aparan hər kəs.

- Tirəklərində mübarizə sözü çox keçir. Sənə görə mübarizə necə olur?

- Mən Azərbaycanda siyasilərin öldürdüyü sözün mahiyyətini yenidən qaytarmaq istəyirəm. Bunun üçün isə təbii ki, gənclər maariflənməli və güclənməlidirlər.

- Bir müddət Fətullah Gülən haqqında rep yazmışdın. Çox ağır formada tənqid edirdin. Onlarla problemin nədir?

- Siz dediyiniz "Yalan" repidir. Nurçuluqla bağlı fikirlərimi bildirmişəm. Repdən də bildiyiniz kimi, onları sevmirəm və real təhlükə kimi görürəm. Çünki Azərbaycan yavaş-yavaş onların təsiri altına düşməyə başlayır. Türkiyəni çatdırdıqları vəziyyət göz önündədir. Mən əslində, hər kəsin nurçulara qarşı çıxacağını gözləyirdim. Amma bu trək çıxdıqdan sonra nədənsə bütün portallar bunu yaymaqdan çəkindilər. Əvəzində isə Türkiyə mediasının 15 internet qəzeti bu trəki paylaşmış və "Azərbaycanlı qardaşlardan dəstək" kimi dəyərləndirmişdilər.

- Konsertdən başqa nə kimi planların var?

- Konsertdən sonra albom üzərində işləyəcəm. Bu mənim ilk albomum olacaq. Həm buna görə, həm də ümumi şəkildə bu albomun mənim üçün böyük dəyəri var.