Bazar ertəsi səhər neft qiymətləri yenidən düşüb.

Axar.az xəbər verir ki, bu, İraqın OPEK-in neft hasilatının azaldılması ilə bağlı tədbirlərinə qoşulmaq istəmədiyini elan etməsindən sonra baş verib. Qiymətlərin enməsinin digər səbəbi isə ABŞ neftçilərinin yenidən işə başlamasıdır.

Nyu York birjasında cümə gününün sonunda "Brent" markalı xam neftin bir barreli 51.59 dollara satılıb. Bu da əvvəlki günün sonuna nisbətən 19 sent, yaxud 0.4 % aşağıdır.

Qərbi Texas xam neftinin qiyməti isə 22 sent, yaxud 0.4% düşərək bir barreli 50.63 dollara çatıb.

Qeyd edək ki, OPEK hasilatı sutkada 32.50 milyon – 33 milyon barrel civarında saxlamağı planlaşdırır. Halbuki sentyabrda bu göstərici sutkada 33.39 milyon barrel idi.

Ancaq OPEK-in Səudiyyə Ərəbistanından sonra ikinci ən böyük hasilatçısı olan İraqın iştirakdan imtinası bu planın gerçəkləşməsini çətinləşdirir. Ötən gün İraq neft hasilatının sutkada 4.774 milyon barrel, ixracatın isə 3.87 milyon barrel olduğunu bildirib.

İraqın Dövlət Neft Marketinq Şirkətinin rəhbəri Falah Əmiri açıqlamasında hasilatın azaldılmayacağını bildirib.

Bazara təzyiq göstərən amillərdən biri də ötən həftə ABŞ-da daha 11 neft buruğunun qurulmasıdır. Bu, avqustdan bəri ilk ikirəqəmli artımdır.

Dollar indeksinin güclənməsi də neft qiymətlərinin azalmasına səbəb olur. Daxildə öz milli valyutalarını işlədən ölkələr nefti dollarla aldıqlarından dolların bahalaşması onları daha çox neft almaqdan çəkindirir. Bu isə yenə də özünü neft qiymətlərinin düşməsində göstərir.

Tələbə gəlincə, Yaponiyanın xam neft idxalı sentyabr ərzində ötən ilin eyni ayına nisbətən 4.6 faiz enərək sutkada 3.27 milyon barrelə çatıb. Lakin ekspertlər aşağı qiymətlərə baxmayaraq, hasilat-istehlak balansının bərpa oluna biləcəyini deyirlər.