Xankəndində məşhur türk firması olan BEKO-nun reklam bilbordları asılıb.

Bu barədə məlumatı "Teleqraf.com" saytı Xankəndinə virtual səfər zamanı aşkarlayıb. Saytın məlumatına görə, foto - Armen G. adlı Xankəndində yaşayan bir erməni internet istifadəçisinin "Google Earth"a daxil etdiyi onlarla fotodan biridir. Qalan fotolar şəhərin küçələrində çəkilib.

Qeyd edək ki, Türkiyə-Ermənistan iqtisadi əlaqələri rəsmi şəkildə təkzib olunur, Azərbaycanın tərkib hissəsi olan Dağlıq Qarabağda isə ofis açmaq Azərbaycanın ərazi bütövlüyünə qarşı çıxmaqdır və bu da ciddi diplomatik skandal və dövlətlararası münasibətlərə zərbə sayılır.

BEKO Türkiyənin məşhur şirkəti - KOÇ Holdinqə aid bir əmtəə markasıdır. Bəyaz əşya sektorunda istehsal və satışla məşğul olan BEKO-nun Yönətim Qurulunun başqanı hazırda Mustafa Qoçdur.