Səudiyyə Ərəbistanının ABŞ və Avropaya neft tədarükünü yarıbayarı azaltması neft bazarına müəyyən qədər müsbət təsir edəcək. Lakin düşünmürəm ki, Səudiyyə neft istehsalını təyin olunmuş limitdən aşağı salsın.

Bu sözləri Axar.az-a açıqlamasında iqtisadçı-ekspert Rəşad Həsənov Səudiyyə Ərəbistanının iyunda ABŞ və Avropaya neft tədarükünü yarıbayarı azaltmaq niyyəti barədə danışarkən deyib.

Ekspert Səudiyyə Ərəbistanının ABŞ və Avropaya neft tədarükünü azaltmasının pərdəarxası məqamlarından danışıb:

“Digər neft hasil edən ölkələr kimi, Səudiyyə Ərəbistanı da gündəlik neft hasilatını azaldacağına dair üzərinə öhdəlik götürüb. Təbii ki, bunun da nəticəsində Səudiyyə bazarlara neft tədarükünü azaltmalı olacaq. İndiki halda Səudiyyə Ərəbistanının ABŞ bazarında iştirakı iqtisadi olaraq səmərəli deyil. Çünki hazırda neftin daşınması və saxlanmasında ciddi problemlər yaşanır. Xüsusilə də tankerlərin boşalmasında gecikmələr baş verir. Digər tərəfdən, Səudiyyə ilə ABŞ arasındakı məsafə də kifayət qədər çoxdur. Bu isə öz növbəsində daşınma xərclərinə təsir edir. Məhz bu səbəbdən Səudiyyə Ərəbistanı ixracı optimallaşdırmağa çalışır”.