Şimal-Cənub beynəlxalq nəqliyyat dəhlizi ilə bağlı işlərin gedişi müzakirə olunacaq.

Axar.az xəbər verir ki, Azərbaycanın Lənkəran və Astara, İranın Astara şəhərlərində Şimal-Cənub beynəlxalq nəqliyyat dəhlizində aparılan işlərin gedişi ilə bağlı görüşlər planlaşdırılır. 9-10 oktyabr tarixlərində baş tutacaq görüşlərdə hər iki tərəfdən əlaqələndirilmiş işin təşkili, yaradılacaq infrastruktur barədə müzakirələr aparılacaq. Həmçinin, dəhlizin Astara (Azərbaycan) - Astara (İran) hissəsinə baxış keçiriləcək.

Görüşlərdə Azərbaycan tərəfindən İqtisadiyyat və Sənaye naziri ilə yanaşı, Xarici İşlər və Nəqliyyat nazirliklərinin, Dövlət Gömrük Komitəsinin, Dövlət Sərhəd Xidmətinin, Azərbaycan Dəmir Yolları QSC-nin, İran tərəfindən aidiyyəti qurumların yüksək səviyyəli şəxslərinin iştirakı nəzərdə tutulur.

Qeyd edək ki, Azərbaycan ilə İran arasında iqtisadi, ticarət, humanitar əməkdaşlıq üzrə Şahin Mustafayevin rəhbərliyi ilə Azərbaycan nümayəndə heyəti 3-4 avqustda İranda səfərdə olmuşdu. Səfər çərçivəsində Şimal-Cənub beynəlxalq nəqliyyat dəhlizinin fəaliyyətinin təkmilləşdirilməsi və səmərəliliyinin artırılması istiqamətində müzakirələr aparılmışdı. Həmçinin, Hökumətlərarası Komissiya həmsədrlərinin rəhbərliyi ilə Azərbaycan və İran nümayəndə heyətlərinin görüşünün keçirilməsi barədə razılıq əldə olunmuşdu.