Bolqarıstan "Türk axını" kəmərinin bir hissəsinin Türkiyədən öz ərazisinə keçməsini Moskvaya təklif edəcək.

Axar.az xəbər verir ki, bunu Bolqarıstanın Energetika nazirinin müavini Anton Pavlov söyləyib. Onun sözlərinə görə, hazırda Bolqarıstan Yunanıstanla yeni interkonnektorun tikilməsi ilə bağlı müqavilə hazırlayır:

"Bu xətt Yunanıstanı gələcəkdə bizlə birləşdirəcək. Bizim təklifimiz ondan ibarətdir ki, rus qazı gələcəkdə Yunanıstan və Bolqarıstan arasında interkonnektordan və ya Türkiyədən birbaşa Bolqarıstana keçməklə Avropaya çata bilər".

Qeyd edək ki, Yunanıstan və Bolqarıstan arasındakı interkonnektorun tikintisi 2017-ci ilin sonuna qədər bitməlidir. Onun istifadəsi isə 2018-ci il üçün nəzərdə tutulur. O iki istiqamətdə qaz əldə etmək üçün istifadə ediləcək. Bunlardan birincisi, Yunanıstanın Kavala şəhərində yerləşən terminaldan sıxılmış qazın alınması, ikincisi isə TANAP kəmərindən gələn təbii qazın əldə edilməsi olacaq.