2015-ci ildə G20-yə ev sahibliyi edən Türkiyə qonaq ölkə kimi Azərbaycanı da toplantıya dəvət edib.

Axar.az xəbər verir ki, 20-dən artıq ölkə başçısının sədrlik etdiyi nümayəndə heyətlərinin iştirak edəcəyi planlaşdırılan toplantı daxilində T20 (Beyin iyirmilik) tədbirinin təşkil edilməsi nəzərdə tutulur. Tədbirdə Azərbaycanın ekspert cəmiyyətini İqtisadi və Sosial İnkişaf Mərkəzinin (İSİM) sədri Vüqar Bayramov təmsil edəcək.

Vüqar Bayramov saytımıza açıqlamasında bildirib ki, sözügedən toplantıda dünyanın aparıcı ölkələrini təmsil edən beyin mərkəzlərinin rəhbərləri iştirak edəcək:

"Nümayəndə heyətlərinin Beyin İyirmiliyin tədbirində iştirakı ilə yanaşı G20 çərçivəsində keçirilən bir sıra tədbirlərə qatılmaq imkanı da olacaq. Tədbirdə eyni zamanda, Azərbaycan Prezidenti Yanında Strateji Araşdırmalar Mərkəzi də iştirak edəcək".

İqtisadçı alim deyib ki, tədbir çərçivəsində qlobal innovasiya, dayanıqlı sənayeləşmədə yeni texnologiyaların rolu, qlobal maliyyə tənizmləmələri və s. qlobal əhəmiyyətli məsələlər müzakirə ediləcək:

"Qlobal beyin mərkəzlərinin gələcək fəaliyyətlərinin koordinasiyası ilə bağlı yeni platformanın hazırlanması və inkişaf etdirilməsi gözlənilir".

Məlumat üçün bildirək ki, iqtisadçı alimin tədbirdə iştirakı Azərbaycan Prezidenti Yanında Qeyri-Hökumət Təşkilatlarına (QHT) Dövlət Dəstəyi Şurası tərəfindən dəstəklənir.

Qeyd edək ki, Böyük İyirmiliyin (G20) Zirvə Toplantısı bu il noyabrın 15-16-da Türkiyənin Antalya şəhərində təşkil ediləcək.