Rusiyanın "Lukoyl" şirkəti "Başneft" dövlət şirkətinin nəzarət paketini almağa hazırdır.

ANS-in məlumatına görə, bu barədə jurnalistlərə şirkətin rəhbəri Vahid Ələkbərov açıqlama verib.

Neft şirkəti "Başneft"in səhm nəzarət paketini girovdan çıxarmağa hazırdır, ancaq bu barədə rəsmi təklifi şirkət hələ hökumətə verməyib.

"Biz öz təklifimizi hökumətə rəsmən etməmişik, hələlik özəlləşdirmə şərti yoxdur. Əgər münasib şərtlər olacaqsa, onda biz bu məsələyə baxmağa və iştirak etməyə hazırıq. Onların nəzarət paketi bizi maraqlandırır", - deyə Ələkbərov bildirib.

Daha əvvəl "Lukoyl"un "Başneft"ə marağı haqqında şəxsi mənbələrə istinadən "Röyter" agentliyi məlumat yayıb. "Forbes" nəşri isə qeyd edib ki, "Qorbuşkina dvora" sahibləri də həmçinin "Başneft"in özəlləşdirməsiylə maraqlanır.

"Lukoyl" neft şirkəti 1993-cü ildə Rusiya Federasiyası hökumətinin qərarı ilə yaradılıb. Nəhəng sənaye-maliyyə kompleksinə malik olan "Lukoyl" şirkəti Rusiya, MDB və dünyanın bir çox ölkələrində neft məhsullarının hasilatı, emalı, satışı və kəşfiyyatı ilə məşğul olur.

Şirkət 1993-cü ildən Azərbaycanda da fəaliyyət göstərir. Rusiyada fəaliyyət göstərən milyarder, həmyerlimiz olan Vahid Ələkbərov "Lukoyl" şirkətinin rəhbəridir.