Ölkəmizdə kifayət qədər müzakirələrə səbəb olan "Qanlı yanvar" filminin Türkiyənin İstanbul şəhərində yerləşən Kanyon Sinemaksimum kinoteatrında təqdimatı baş tutub.

Axar.az xəbər verir ki, bu barədə türk mətbuatı yazıb. Təqdimatdan sonra film bütün Türkiyə kinoteatrlarında nümayiş olunacaq.

Son filminin həyəcanını qırmızı xalçada media nümayəndələri ilə paylaşan türkiyəli aktrisa Nəbahət Çehrə gecədə geydiyi paltarla da diqqət mərkəzində olub. Qala gecəsində Mübariz Mənsimov, Rəşad Abdullayev, Mahsun Qırmızıgül, Buket Taşdelen, İpek Bilgin, müğənni Günel və millət vəkili Qənirə Paşayeva da iştirak edib.

Xatırladaq ki, "Qanlı yanvar" filmi bizə sovet ordusunun törətdiyi qırğını və o qanlı gecə baş verənləri Azərbaycan ailəsi olan - Nərimanovların gözü ilə göstərir. İki qardaş - kommunist Nəcəf və inqilabçı Mehdi əks düşüncəyə sahibdirlər. Onlar inandıqları uğrunda ölüm-dirim mübarizəsinə başlayıblar. Dramın mərkəzində isə onların anası - Xədicə dayanıb.