Kult.az Müşfiq Abbasovla müsahibəni təqdim edir:

- Müşfiq müəllim, telefonla müsahibəyə razılaşdığınız üçün təşəkkür edirik...

- Buyurun, xoşdur.

- Sizə üstünüzdə telefon saxlamağa və danışmağa icazə verirlər?

- Başa düşmədim! Kim icazə verməlidir ki? Mən danışmaq üçün niyə icazə almalıyam?

- Yəni siz saxlanılmamısınız?

- Hazırda iş dalısıyca gedirəm, şəhərin mərkəzində tıxacda qalmışam. Siz buna “saxlanılmaq” deyirsiniz?

- Həbs olunmusunuz axı...

- Yalandır, mənim nə günahım var ki, həbs də olunam. Bunu yəqin ki, sarı mətbuat uydurub...

- Baş Prokurorluğun rəsmi açıqlaması var.

- Nə açıqlamadır?

- Bildirilib ki, siz informasiya ehtiyatında və ya informasiya-telekommunikasiya şəbəkəsində “İnformasiya, informasiyalaşdırma və informasiyanın mühafizəsi haqqında” Azərbaycan Respublikasının Qanunu ilə yayılması qadağan edilən informasiyanın yerləşdirilməsinə yol vermişiniz...

- Mənim informasiya resursumda heç bir qanun pozulmur, girib, özünüz yoxlaya bilərsiniz.

- Bu məlumatdan sonra iddia edirlər ki, sizin çıxışlarınız “yuxarılar”ın xoşuna gəlmədiyi üçün...

- Bizim çıxışlarımız “yuxarılar”ın da, “aşağılar”ın da xoşuna gəlir, tirajımız milyonlarla ölçülür, şərhlərdə bizə hər kəsin necə hörmət, sevgi göstərdiyini özünüz görə bilərsiniz.

- Bəzilərini qıcıqlandırdığınız bildirilir.

- Əksinə, hər kəs “qıcıqlananda” bizim səhifəmizə girir ki, əsəbləri sakitləşsin. Biz insanlara yalnız sevinc, fərəh, gülüş bəxş edirik, ictimai gərginliyi suçəkən kimi çıxarırıq. Bizə baxıb, yalnız gülmək olar, əsəbiləşmək yox.

- Siz ciddi danışırsınız?

- Şübhə edirsinizsə, sizi 23 mayda Bakıda keçiriləcək növbəti konsertimizə dəvət edirəm.

- Konsert nədir?

- “Konsert”in nə olduğunu bilmirsiniz?

- Müşfiq müəllimlə danışıram?

- Bəli.

- Abbasov?

- Bəli.

- Hüquqşünas?

- “Bu şəhərdə”nin prodüseri, ssenaristi...

- Səhv salmışıq. Bəs, bayaqdan niyə demirsiniz?

- Siz nə vaxt soruşdunuz ki?

- Onda sizdən tanınmış adaşınız haqda soruşaq...

- Allah rəhmət eləsin, abdalgülablı Müşfiq Abbasov 2020-ci il savaşına iki oğlu ilə birgə qatılmışdı, qəhrəmancasına da şəhid oldu. Şəhidimizin ruhu önündə baş əyirəm, adaşıma qəni-qəni rəhmət diləyirəm.

- Allah rəhmət eləsin. Ancaq hüquqşünas Müşfiq Abbasovu nəzərdə tuturduq...

- Hüquqşünasa hüquqi məsləhətlər verə bilmərəm. Ancaq 15 sutkadır, inşallah, 23 maya qədər içəridə qalmaz.

- Nə arzulayardınız?

- Arzulayardım ki, o, Nigar Camalı tənqid edəndə media mənim şəklimlə o xəbəri yaymasın...

- Elə bir səhv də olub?

- Olub.

- Demək, indiki yanlış ilk deyil!

- Hətta ikinci də deyil.

- Təşəkkür edirəm.

- Mən sizə təşəkkür edirəm. Tıxacda başımı qatdınız...

P.S. “Müsahibə” xəyal məhsuludur...